തെസ്നിത്തായുടെ സുബി

രണ്ടു ദശാബ്ദം ഒരുമിച്ച് സഞ്ചരിച്ച രണ്ടുപേർ, വിടപറഞ്ഞ കൂട്ടുകാരിയെ കുറിച്ച് തെസ്നി ഖാൻ എഴുതുന്നു

ചിലർ അങ്ങനെയാണ് ഒരു ചിത്രശലഭം പോലെ, വർണാഭമായ ജീവിതം നയിച്ച് പെട്ടെന്നൊരു ദിവസം എങ്ങോട്ടോ പറന്നുപോകും, സുബിയെപ്പോലെ. എന്റെ സഹോദരിയായിരുന്നു സുബി. അത്രയേറെ ദിനങ്ങൾ ഞങ്ങൾ ഒന്നിച്ച് ചെലവഴിച്ചിട്ടുണ്ട്. വർഷങ്ങൾക്ക് മുൻപ് സൂര്യാ കൃഷ്ണമൂർത്തിയുടെ നേതൃത്വത്തിൽ എറണാകുളത്ത് നടത്തിയ ലൈറ്റ് ആൻഡ് സൗണ്ട് ഷോയ്ക്കിടെയാണ് ഞാൻ സുബിയെ ആദ്യമായി പരിചയപ്പെടുന്നത്. അന്ന് അതിഥികളെ വരവേൽക്കാനുള്ള ടീമിൽ എനിക്കൊപ്പം സുബിയുമുണ്ടായിരുന്നു. സെറ്റ് മുണ്ടൊക്കെ ഉടുത്ത ഒരു മെലിഞ്ഞ പെൺകുട്ടി, അതായിരുന്നു അന്ന് സുബി, അക്കാലത്ത് അവൾ എറണാകുളത്ത് പഠിക്കുകയാണ്. പിന്നീട് ഞങ്ങൾ കാണുന്നതും അടുത്ത സുഹൃത്തുക്കളാകുന്നതും ഏഷ്യാനെറ്റിലെ ഹാസ്യപരിപാടിയായ സിനിമാല'യിൽ വെച്ചാണ്. ഡയാന ചേച്ചി സംവിധാനം ചെയ്ത “സിനിമാല'യിൽ ആദ്യഘട്ടം മുതൽ ഉണ്ടായിരുന്ന സ്ത്രീ അഭിനേതാക്കൾ ഞാനും സുബിയുമായിരുന്നു. പതിനഞ്ചു കൊല്ലത്തോളം ഞങ്ങൾ ഒന്നിച്ച് സിനിമാലയുടെ നിരവധി എപ്പിസോഡുകളിൽ അഭിനയിച്ചു. ഞാൻ സുബിയുടെ അമ്മ, ചേച്ചി, കൂട്ടുകാരി, ശത്രു തുടങ്ങി വിവിധ വേഷങ്ങൾ ചെയ്തു. അതിന്റെ കൂടെത്തന്നെ ഒന്നിച്ച് ഒരുപാട് സ്റ്റേജ് ഷോകളും ചെയ്തു. സുബി സ്റ്റേജിൽ എന്നെക്കാൾ മിടുക്കിയാണ്. സ്കിറ്റ് ചെയ്യുന്നതിലും ആങ്കറിങ് ചെയ്യുന്നതിലുമെല്ലാം അവൾക്ക് പ്രത്യേക കഴിവുണ്ടായിരുന്നു. ഞാൻ സിനിമയിൽ വിവിധ കഥാപാത്രങ്ങൾ ചെയ്ത അതേസമയത്ത് സുബി സ്റ്റേജുകളിൽ നിന്ന് സ്റ്റേജുകളിൽ ഇടതടവില്ലാതെ പറന്നു. എന്നും വിളിക്കുന്ന സൗഹൃദമായിരുന്നില്ല ഞങ്ങളുടേത്. ഇടയ്ക്ക് വിളിച്ച് വിശേഷങ്ങൾ അന്വേഷിക്കും, നേരിട്ട് കാണുമ്പോൾ സ്നേഹം കൈമാറും അതായിരുന്നു ഞങ്ങളുടെ രീതി.

കുടുംബമായിരുന്നു എല്ലാം