ફિક્કા ન પડવા દો સંબંધના રંગ

પ્રેમ અને દૂર થતા સંબંધને હોળીનો તહેવાર કેવી રીતે નવો આયામ અને રંગ આપે છે. શું જાણવા નહીં ઈચ્છો..

આજે વર્ષ પછી હોળીના દિવસે અમિતા ખૂબ ખુશ હતી. ઘરમાં બાળકોનો કોલાહલ અને તેમના ખડખડાટ તેના દિલને આરામ આપી રહ્યા હતા. કિચનમાં તેની દેરાણી નેહા ભજિયાં બનાવી રહી હતી, તેની સુગંધથી પૂરું ઘર મહેકતું હતું. સાસુસસરાએ તેને સવારમાં આશીર્વાદ આપ્યા હતા. તેના દિયર અને પતિ રંગ લાવીને હોળી રમવા નીકળી ગયા હતા. બાળકો પણ પિચકારી ભરીને એકબીજાને ભીંજવી રહ્યા હતા.

નેહાએ ભજિયાં બનાવી દીધા હતા. અમિતાએ હાથ પકડીને તેને કિચનમાંથી બહાર કાઢી અને તેના પૂરા ચહેરા પર રંગ લગાવી દીધો.

નેહા પણ ક્યાં ચુપ રહેવાની હતી. તેણે બાળકોના હાથમાંથી રંગવાળું પાણી ભરેલી ડોલ લઈને તેની પર રેડી દીધી.

આજે હોળીના રંગમાં રંગાઈને અમિતા કેટલી ખુશ હતી તે માત્ર એ જ જાણતી હતી, નહીં તો છેલ્લા ૩-૪ વર્ષથી તે માત્ર દેખાડા માટે તહેવાર ઊજવી રહી હતી.

અમિતાને આજે પણ યાદ હતી તે સાંજ જ્યારે નાની વાત પર તેનો અને નેહાનો ઝઘડો થયો હતો. વાત નાની હતી, પણ તેમાં ઘરના બધા લોકો ઈન્વોલ્વ થયા હતા. સાસુસસરા પણ અમિતાથી નારાજ થયા. તેમનું માનવું હતું કે ઘરની મોટી વહુ હોવાથી તેણે થોડી ધીરજથી કામ લેવું જોઈતું હતું. નેહા નવી વહુ હતી. થોડીક બાલિશ હતી, તેથી તેને કોઈ કંઈ કહેતું નહોતું. અમિતાને આ વાત ન ગમી અને તેણે બધા સંપર્ક તોડી નાખ્યા. તેના પતિએ તેને સાથ આપ્યો અને તેણે લગભગ ૪ વર્ષ સુધી નેહા અને સાસુસસરા સાથે વાત ન કરી. બાળકો દર વર્ષે હોળીમાં પિતરાઈ ભાઈબહેનને યાદ કરતા, પણ અમિતા તેમને ચુપ કરાવી દેતી.

ફરિયાદ દૂર કરવાનો તહેવાર

આ વર્ષે હોળીના થોડાક દિવસ પહેલાં તેના પતિ દિવાકરે તેને સમજાવી હતી કે અમિતા લોહીના સંબંધ આ રીતે ન તોડી શકે. તહેવારની મજા તો પોતાના પ્રિયજન સાથે મળીને ઊજવવામાં આવે છે. તું નેહાથી મોટી છે. તું મોટું મન રાખીને તેને માફ કરી દે. હોળી તો એમ પણ ઉજવવાનો તહેવાર છે. હવે સ્નેહીજનો સાથે તૂટેલા સંબંધ ફરીથી જોડો. તેમાં જ આપણી ખુશી છે.

દિવાકરની વાતની તેની પર ઊંડી અસર થઈ. જોકે દિવાકર એક સારો માણસ હતો અને તે તેમની કોઈ વાતને ઈગ્નોર નહોતી કરી શકતી. હોળીના ૨ દિવસ પહેલાં તેણે સાસુને કોલ કર્યો. તેમના હાલચાલ પૂછીને નેહા સાથે વાત કરી.