അഭിനയം ജീവവായുവാണ്

'ചുരുളി'യിലെ പെങ്ങൾ തങ്ക ഇവിടെയുണ്ട്...

- നിരഞ്ജന ഇന്ദു

അരങ്ങിൽ ഓരോ വേഷപ്പകർച്ച നടത്തുമ്പോൾ കാണികളുടെ കയ്യടി ലഹരി പോലെയായിരുന്നു ഗീതി സംഗീതയ്ക്ക്. പിന്നീട് ആ അഭിനയപാടവം ക്യാമറയ്ക്ക് മുന്നിൽ എത്തിയപ്പോൾ അഭിനയത്തെ കൂടുതൽ പഠിച്ചു, കൂടുതൽ അറിയാൻ ശ്രമിച്ചു. അത് പിന്നീട് അഭിനയത്തോടുള്ള പ്രണയമായി മാറുകയായിരുന്നു. സിവിൽ എൻഞ്ചിനീയറിംഗ് ജോലി ഉപേക്ഷിച്ചാണ് ഗീതി സിനിമയിലേക്ക് എത്തുന്നത്. ഇപ്പോൾ ഗീതിയുടെ ജീവിതവും സന്തോഷവുമെല്ലാം അഭിനയമാണ്. തന്റെ ഏറ്റവും പുതിയ വിശേഷങ്ങൾ ഗീതി സംഗീത പറഞ്ഞു തുടങ്ങി...

പെങ്ങൾ തങ്കയാണ് എന്റെ ഐഡന്റിറ്റി

ഒരുപാട് സിനിമകളിൽ അഭിനയിച്ചിട്ടുണ്ടെങ്കിലും ലിജോ ജോസ് പെല്ലിശ്ശേരി സംവിധാനം ചെയ്ത ചുരുളിയിലെ പെങ്ങൾ തങ്കയാണ് എന്റെ അഡ്രസ്സ് എന്നുപറയുന്നതാവും ശരി. പലർക്കും എന്നെ അറിയാവുന്നത് പെങ്ങൾ തങ്കയായി അഭിനയിച്ചതിനുശേഷമാണ്. എന്റെ സിനിമാ കരിയർ എടുത്തുനോക്കുമ്പോൾ പെങ്ങൾ തങ്കയ്ക്ക് മുൻപും പിൻപുമെന്നും പറയേണ്ടി വരും. പെങ്ങൾ തങ്കക്കു ശേഷം എന്റെ സിനിമാ കരിയറിൽ വലിയൊരു മാറ്റം ഉണ്ടായിട്ടുണ്ട്. അത്രയധികം സന്തോഷവുമുണ്ട്.

ലിജോ സാർ എന്ന മജീഷ്യൻ