വഴിത്തിരിവായ സമാഗമം

അഷ്ടപദിയാട്ടം പുനർജ്ജനിച്ചപ്പോൾ

- പ്രദീപ് ഉഷസ്സ്

ഭാരതത്തിന്റെ നൃത്തകലാപാരമ്പര്യത്തിൽ, സവിശേഷ പ്രാധാന്യമാണ് അഷ്ടപദിയാട്ടത്തിനുള്ളത്. കഥകളിക്ക് മുമ്പേ രൂപം കൊണ്ട് ഈ കലാരൂപം നിർഭാഗ്യവശാൽ, കാലപ്രവാഹത്തിൽ മറഞ്ഞുപോവുകയായിരുന്നു. കഥകളിയാചാര്യൻ പത്മശ്രീ ഗുരു ചേമഞ്ചേരി കുഞ്ഞിരാമൻ നായരുടെ കഠിനാധ്വാനത്താലാണ് ഈ വിശ്രുത കലാരൂപത്തിന് പുനർജ്ജനിയുണ്ടായത്.

"ഗുരുവിന്റെ നിർദ്ദേശങ്ങൾക്കൊത്ത്, ആ ദൗത്യം ഏറ്റുവാങ്ങാനുള്ള മഹാഭാഗ്യം എനിക്കാണ് ലഭിച്ചത്. എന്റെ ജീവിതത്തിലെ ഏറ്റവും വലിയ സൗഭാഗ്യവും അതുതന്നെയാണ്. കേരള സംഗീതനാടക അക്കാദമി പുരസ്ക്കാര ജേതാവ്, കലാമണ്ഡലം ഷീബാ കൃഷ്ണകുമാർ "മഹിളാരത്ന'ത്തോട് സംസാരിക്കുകയായിരുന്നു.

ആസ്വാദക ലോകത്തിൽ നിന്നും എന്നേ മറഞ്ഞുപോകുമായിരുന്ന അഷ്ടപദിയാട്ടത്തെ നിരന്തര സാധനയിലൂടെ പുനരുജ്ജീവിപ്പിക്കുകയും, നിലനിർത്തുകയും ചെയ്യുന്ന അതുല്യകലാകാരിയാണ് ഷീബാകൃഷ്ണകുമാർ, ഗീതഗോവിന്ദത്തിൽ നിന്ന് അഷ്ടപദിയാട്ടത്തിലേക്ക് ജയദേവകവിയുടെ ഗീതഗോവിന്ദ ആധാരമാക്കി രൂപം കൊണ്ട് കലാരൂപമാണ് അഷ്ടപദിയാട്ടം. പിൻപാട്ടും താളവുമെല്ലാം ഇതര നൃത്തരൂപങ്ങളെപ്പോലെയാണെങ്കിലും, ആവിഷ്ക്കാരശൈലിയിൽ കഥകളിയോടാണ് അഷ്ടപദിയാട്ടത്തിന് ഏറെ സാമ്യം. ഗവേഷകനും അധ്യാപകനുമായ പ്രൊഫ. കരിമ്പുഴ രാമകൃഷ്ണൻ ഗീതഗോവിന്ദത്തെ അടിസ്ഥാനമാക്കി ചിട്ടപ്പെടുത്തിയ തിരക്കഥയ്ക്ക് ശാസ്ത്രീയ നൃത്ത ഭാഷ്യത്തിലൂടെ ജീവൻ പകർന്നത് പത്മശ്രീ ഗുരു ചേമ ഞ്ചേരി കുഞ്ഞിരാമൻ നായരാണ്. അദ്ദേഹത്തിന്റെ ശിഷ്യയായ സീതാലക്ഷ്മി ശ്രീനിവാസനാണ് ആദ്യമായി അഷ്ടപദിയാട്ടം വേദിയിലവതരിപ്പിച്ചത്. പിൽക്കാലത്ത് വിസ്മൃതിയിലാണ്ടു പോയ ഈ അതുല്യകലാരൂപത്തെ ഇന്ന് കാണുന്നവിധത്തിൽ വളർത്തിയെടുക്കുകയും, വേദികളിൽ സുപരിചിതമാക്കുകയും ചെയ്തത്. ഗുരുവിന്റെയും സീതാദേവിയുടേയും ശിഷ്യയായ ഷീബകൃഷ്ണകുമാറാണ്.