നവതിയുടെ നിറവിൽ അഭിനയകുലപതി

മധു എന്ന രണ്ടക്ഷരം കൊണ്ട് നമ്മൾ മലയാളികളുടെയെല്ലാം മനസ്സിലെന്നും മാധുര്യമുള്ള മധുവായി തീർന്ന മലയാളസിനിമയിലെ എക്കാലത്തേയും താരചക്രവർത്തി മഹാനടൻ മധുവിന് ഈ സെപ്തംബർ ഇരുപത്തിമൂന്നാം തീയതി തൊണ്ണൂറാം ജന്മദിനമാണ്.

- സായിരാജലക്ഷ്മി, ചെറുശ്ശേരി മന [e-mail]

അഭിനയത്തോടുള്ള അദമ്യമായ ആഗ്രഹം മൂലം കോളേജിലെ ഹിന്ദി അദ്ധ്യാപക ജോലി ഉപേക്ഷിച്ച് അഭിനയത്തിലെത്തിയ അദ്ദേഹം മലയാളസിനിമയിലെ എന്നും തിളങ്ങുന്ന താരമായി മാറിയത് ചരിത്രം.

അഭിനയ ജീവിതത്തിന്റെ ആറു പതിറ്റാണ്ട് പിന്നിട്ട് തലമുറകളിലൂടെ സഞ്ചരിച്ചുകൊണ്ടിരി ക്കുന്നു ഈ അഭിനയ കുലപതി. ചെറുപ്പകാലത്ത് നാടകങ്ങളിൽ അഭിനയിച്ചതിന് അച്ഛന്റെ കയ്യിൽ നിന്നും ഏറെ തല്ല് കിട്ടിയിട്ടുള്ള അദ്ദേഹം മലയാള സിനിമയുടെ കാരണവരായി മാറി.

ആദ്യ സിനിമ റിലീസായപ്പോൾ മാധവൻ നായർ എന്ന തന്റെ പേര് കാണാത്തതിൽ പരിഭവിച്ച് നിർമ്മാതാവിനോട് ചോദിച്ചപ്പോഴാണ് താൻ പോലും അറിയാതെ തന്റെ പേര് മധു എന്നാക്കിയത് അറിഞ്ഞത്. പിന്നീട് ആ പേര് അദ്ദേഹം മലയാളസിനിമയുടെ അഭ്രപാളികളിൽ തങ്കലിപികളാൽ എഴുതിച്ചേർത്തു.

സിനിമയിലെ പരമോന്നത ബഹുമതിയായ ജെ.സി ഡാനിയൽ അവാർഡും പത്മശ്രീയും ഉൾപ്പെടെ നിരവധി അവാർഡുകളും പുരസ്കാരങ്ങളും നേടിയ ഈ അഭിനയ സാമ്രാട്ട്, പതിനൊന്ന് സിനിമകൾ സംവിധാനം ചെയ്തു, പതിനഞ്ച് സിനിമകൾ നിർമ്മിച്ചു. അഞ്ച് സിനിമകൾ സംവിധാനം ചെയ്യുകയും, നിർമ്മിക്കുകയും അവയിൽ അഭിനയിക്കുകയും ചെയ്തു. ഇങ്ങനെ സിനിമ യുടെ എല്ലാ മേഖലകളിലും തന്റെ വ്യക്തിമുദ്ര പതിപ്പിച്ച ഈ അഭിനയ പ്രതിഭ, മലയാളം കൂടാതെ തമിഴ്, തെലുങ്ക്, ഹിന്ദി ഭാഷകളിലും അഭിനയിച്ചിട്ടുണ്ട്.

തൊണ്ണൂറുകളിൽ ദൂരദർശന്റെ 004 ചാനലിൽ വന്ന ദേവാങ്കണം എന്ന സീരിയൽ കാണാനായി ടി.വിയുടെ മുന്നിൽ ആളുകളെ പിടിച്ചിരുത്തിയത് പ്രൗഢിയും പ്രസരിപ്പും നിറഞ്ഞ മധു എന്ന മലയാ ളികളുടെ പ്രിയപ്പെട്ട നടൻ ആ സീരിയലിൽ അഭിനയിച്ചതു കൊണ്ടു മാത്രമാണ്. സിനിമയെന്നോ സീരിയലെന്നോ വ്യത്യാസമില്ലാതെ അഭിനയത്തിന് മാത്രം പ്രാധാന്യം കൊടുത്ത ഈ അതുല്യ നടൻ ബിഗ് സ്ക്രീനിൽ നിന്നും മിനിസ്ക്രീനിലേക്ക് - അഭിനയിക്കാൻ സിനിമാതാരങ്ങൾക്ക് പ്രചോദനമേകി ഒരു വലിയ മാറ്റത്തിന് തുടക്കമിടുകയായിരുന്നു.