കലയാണ് ഞങ്ങളുടെ നിധി ഹരീഷ് - ബിന്ദു പേരടി

മലയാളികൾ എന്നും ഓർത്തിരിക്കുന്ന ഒത്തിരി കഥാപാത്രങ്ങൾക്ക് ജീവൻ നൽകിയ ഹരീഷ് പേരടി മഹിളാരത്നം' വായനക്കാരുമായി എന്റെ വിശേഷങ്ങൾ പങ്കുവയ്ക്കുകയാണ്

- നാസർ മുഹമ്മദ്,

പേരടി തറവാട്ടിലെ ഇളയപുത്രൻ മലയാളവും കടന്ന് അന്യഭാഷകളിൽ തിരക്കുള്ള നടനായി മാറുന്ന ഒരു കാലം വരുമെന്ന് ആ അമ്മ മനസ്സിൽ കരുതിയിരിക്കാം. മകന്റെ നാടകങ്ങൾ കണ്ട് മറ്റുള്ളവരോട് അവന്റെ അഭിനയത്തെക്കുറിച്ച് വാതോരാതെ പറഞ്ഞ അമ്മ നീ നാടകം കളിച്ചു നടന്നാൽ മതിയോ...ഒരു ജോലിയൊക്കെ വേണ്ടേ... എന്നുപറയുമ്പോഴും അമ്മയുടെ ഉള്ളുനിറയെ മകന്റെ പാഷൻ പ്രൊഫഷനായി മാറുമെന്ന് അറിയാമായിരുന്നു. അമ്മയുടെ പ്രാർത്ഥനയും പ്രോത്സാഹനവുമായിരിക്കാം എന്നിലെ നടനെ വളർത്തി വലുതാക്കിയത്. മലയാളികൾ എന്നും ഓർത്തിരിക്കുന്ന ഒത്തിരി കഥാപാത്രങ്ങൾക്ക് ജീവൻ നൽകിയ ഹരീഷ് പേരടി മഹിളാരത്നം' വായനക്കാരുമായി എന്റെ വിശേഷങ്ങൾ പങ്കുവയ്ക്കുകയാണ്.

പൂക്കൾ കോച്ചി നടന്ന നാൾ

കോഴിക്കോട് നഗരത്തിൽ ജനിച്ചുവളർന്നതിനാൽ പൂവട്ടിയും ഇലക്കുമ്പിളുമായി നാട്ടിടവഴികളിലും വയൽ വരമ്പുകളിലും ഓടിനടന്ന് പൂക്കൾ പറിച്ചുനടന്ന ബാല്യമൊന്നും എനിക്ക് അവകാശപ്പെടാനില്ല. ഉള്ളത് സഹോദരങ്ങളോടൊപ്പം പൂ കൊച്ചി നടന്ന ബാല്യം മാത്രമാണ്. പൂ കോച്ചുക എന്നുപറഞ്ഞാൽ ഒരുതരം മോഷണം തന്നെ. ചിരിച്ചുകൊണ്ട് ഹരീഷ് പറഞ്ഞു തുടങ്ങി. വലിയ കൊക്കയുണ്ടാക്കി ഞാനും ചേട്ടനും ചേച്ചിയുമൊക്കെ വീടിന് പുറത്തുകടന്ന്  റോഡിലൂടെ നടന്ന് മറ്റുവീടുകളിൽ നിന്നും റോഡിലേക്ക് തല നീട്ടി നിൽക്കുന്ന പൂക്കളെ ആ വീട്ടുകാർ അറിയാതെ കൊക്കയിട്ട് താഴ്ത്തി പറിച്ചെടുക്കുന്ന കലാപരിപാടിയിലൂടെ ശേഖരിക്കുന്ന പൂക്കളായിരുന്നു ഞങ്ങളുടെ ഓണത്തിന് മുറ്റത്തെ പൂക്കളമായി മാറിയിരുന്നത്.