തൃപ്രയാറിലെ പാട്ടുകുടുംബം

ഹിന്ദു- മുസ്ലീം-ക്രൈസ്തവ ഭക്തിഗാനങ്ങൾക്ക് ശബ്ദ- ഭാവ ഹൃദ്യത നൽകുന്ന മുസ്ലീം പാട്ടുകുടുംബം

- പി.ജയചന്ദ്രൻ

സംഗീതത്തിന് ഒരു മാസ്മരികതയുണ്ട്. ചില പാട്ടുകേട്ടാൽ കരിങ്കല്ലും ചലിക്കും എന്നൊക്കെ പറയുന്നത് ആ മാസ്മരികതയ്ക്ക് തെളിവാണ്. അങ്ങനൊരു മാസ്മരിക ശബ്ദത്തിനുടമയെ അടുത്തകാലത്ത് ഇതേ പേജുകളിലൂടെ പരിചയപ്പെടുത്തിയത് മറക്കാൻ സമയമായിട്ടില്ല. തുളസിക്കതിർ നുള്ളിയെടുത്ത് കണ്ണന്നൊരു മാലയ്ക്കായ്.. എന്ന കൃഷ്ണഭക്തിഗാനം പാടിയ കൊല്ലം കരുനാഗപ്പള്ളി സ്വദേശിനി ഹനാഫാത്തിം എന്ന പ്ലസ് ടു കാരിയായിരുന്നു ആ മിടുക്കി. ആ ഗാനത്തിലെ കണ്ണാ...കണ്ണാ... എന്നുള്ള വരികൾ ഹന പാടുന്നത് കേൾക്കുകയും കാണുകയും ചെയ്താൽ കണ്ണൻ നേരിൽ പ്രത്യക്ഷപ്പെടുമെന്നാണ് ഒരു പ്രശസ്ത സംഗീത സംവിധായകൻ തന്നെ പറഞ്ഞത്.

കൃഷ്ണഭക്തിയുടെ എല്ലാ ഭാവങ്ങളും ഉൾക്കൊണ്ടു കൊണ്ട്, അത്ര ആർദ്ര സുന്ദര ശബ്ദത്തിലാണ് ഹന പാടുന്നത്. ഹനയ്ക്ക് മുൻപും ശേഷവും തൃക്കൊടിത്താനം സച്ചിദാനന്ദൻ ഉൾപ്പെടെയുള്ള നിരവധി പ്രശസ്ത ഗായകർ ആ ഗാനം പാടിയിട്ടുണ്ടെങ്കിലും അതൊരു തരംഗമാക്കി മാറ്റിയത് ഹനയുടെ ശബ്ദമാണ്. പുറമേക്ക് എന്തൊക്കെ പറയുമ്പോഴും വർഗ്ഗീയതയുടെ വിഷവിത്തുകൾ മനസ്സിൽ പേറുന്ന ഒരു സമൂഹത്തിൽ ഒരു ഹൈന്ദവ ആരാധനാ മൂർത്തിയെക്കുറിച്ചുള്ള ഒരു മുസ്ലീം പെൺകുട്ടി പാടി വൈറലാക്കി എന്നുള്ളതായിരുന്നു ആ പാട്ടിന്റെ ഏറ്റവും വലിയ പ്രത്യേകത.

ഗാനം എന്നാൽ അതുപോലൊരു പ്രത്യേകതയുമായി കേരളത്തിന്റെ സാംസ്ക്കാരിക തലസ്ഥാനമായ തൃശ്ശിവ പേരൂരിൽ നിന്നുള്ള ഒരു പാട്ടുകുടുംബത്തെ കൂടി വായനക്കാർക്ക് പരിചയപ്പെടുത്തുകയാണ്.

തൃശൂർ തളിക്കുളം പുതിയ വീട്ടിൽ നിഷാദ് സുൽത്താനും, ഭാര്യ സജിനാ നിഷാദും, മകൾ ദിൽറുബ നിഷാദുമാണ്, പാട്ടുഫാമിലി എന്ന് ഇതിനകം തന്നെ പേര് സമ്പാദിച്ചുകഴിഞ്ഞിട്ടുള്ള ആ സംഗീതകുടുംബം. ഇവർ മൂവരും ചേർന്ന് പാടി അടുത്ത നാളിൽ റിലീസായ ശബരിഗിരീശ ഭക്തി ഗാനങ്ങളാണ് ഇപ്പോൾ വൈറലായിക്കൊണ്ടിരിക്കുന്നത്. സുലൈമാൻ മതിലകം രചനയും, അൽഷാദ് തൃശൂർ സംഗീത സംവിധാനവും നിർവ്വഹിച്ചിട്ടുള്ള ഈ ഗാനം, ഒരുപിടി മുസ്ലീം സഹോദരങ്ങൾ ശബരീശന് സമർപ്പിക്കുന്ന കാണിക്കയായിക്കൂടി കരുതാവുന്നതാണ്.