കലാകാരന്മാർ കോർണർ ചെയ്യപ്പെടുന്ന കാലം

സാജു നവോദയയും ഭാര്യ രശ്മിയും വിശേഷങ്ങളുമായി ‘മഹിളാരത്ന'ത്തി നോടൊപ്പം

- ശരത് സുബ്രഹ്മണ്യൻ

സിനിമാക്കാരെക്കുറിച്ച് ഒരു പാട് വാർത്തകൾ ഉണ്ടാകുന്ന സമയത്തിലൂടെയാണ് നമ്മൾ കടന്നു പോയ്ക്കൊണ്ടിരിക്കുന്നത്. നല്ല മനസ്സിനുടമകളായിവർ സിനിമാക്കാരുടെ ഇടയിലും ഒരുപാട് ഉണ്ടന്നാണ് നിങ്ങളുടെ ജീവിതം കാണിച്ചു തരുന്നത്?

കലാകാരന്മാർ കോർണർ ചെയ്യപ്പെടുന്ന കാലമാണിത്. ആളുകളിലേക്ക് സത്യാവസ്ഥ എത്താത്തതു കൊണ്ടുതന്നെ ആളുകളെല്ലാം വലിയ ആശയക്കുഴപ്പത്തിലാണ്. ഞങ്ങൾ ചെയ്യുന്ന കാര്യം ആളുകളിലേക്ക് എത്തിക്കണം എന്നൊന്നും ആഗ്രഹമുണ്ടായിരുന്നില്ല. അന്ന് നടന്ന അഭിമുഖത്തിൽ ചോദ്യകർത്താവ് ചോദിച്ചപ്പോൾ പറഞ്ഞു പോയതാണ്.

പ്രേക്ഷകർ താങ്കളെ അറിയുന്നത് പാഷാണം ഷാജി എന്ന ഒരു നടനായി മാത്രമാണ്. സ്വന്തം വീട് വിറ്റ് മറ്റൊരു വ്യക്തിക്ക് വീട് നിർമ്മിച്ചു നൽകിയ സന്മനസ്സുള്ള ഷാജിയെ പ്രേക്ഷകർക്കറിയില്ല. മറ്റൊരാൾക്ക് വേണ്ടി സ്വന്തം വീട് വിൽക്കാൻ എങ്ങനെയാണ് തോന്നിപ്പിച്ചത് ?

എന്റെ സുഹൃത്ത് വഴിയാണ് ഞാൻ മരടിലുള്ള ഈ കുടുംബത്തെക്കുറിച്ചറിയുന്നത്. ഞാൻ അവരുടെ അടുത്തേക്ക് പോയപ്പോഴാണ് അവരുടെ ദുരിതജീവിതം ശരിക്കും മനസ്സിലാകുന്നത്. ഫ്ളെക്സ് വിരിച്ചിട്ടുള്ള വീടെന്ന തോന്നൽ പോലും തരാത്ത ഒന്നിലാണ് അവർ താമസിക്കുന്നത്. കുളി മുറിയോ ടോയ്ലറ്റോ ഒന്നുമില്ല. ആദ്യം അവർക്കെന്തെങ്കിലും സഹായം ചെയ്തുകൊടുക്കാം എന്നാണ് ഞങ്ങൾ കരുതിയത്. പിന്നീടാണ് വീട് നിർമ്മിച്ചുകൊടുക്കാം എന്ന ആശയത്തിലേക്ക് എത്തുന്നത്. ഷാജി മുന്നിലുണ്ടങ്കിൽ ഞങ്ങൾ കൂടെയുണ്ട് എന്ന് പറഞ്ഞു കൊണ്ട് വേറെ ചില സുഹൃത്തു ക്കളും ഞങ്ങൾക്കൊപ്പം ചേർന്നു.