பூசத்திருவிழாவும் ஈசன் திருநாளும்!

முருகாவென ஓர் தரம் ஓதடியார் முடிமேல் இணை தாள் அருள்வோனே... என்று ஒரு முறை அவரை அழைத்தால் போதும்,தன் திருப்பாத மலரை அடியார் தலையில் வைத்து அருளுபவன் ஆறுமுகப் பெருமான்! மாமயிலோன் கால் பட்டழிந்தது என் தலைமேல் அயன் கையெழுத்தே.. என்று அருணகிரியார் கூறுவது போல், நம் தீவினைகளை அழித்து சீர்மிகு வாழ்வினை நல்குபவன் சிவபாலன்! அவரைப் போற்றிக் கொண்டாடும் விழாக்களில் தைப்பூசத் திருவிழாவும் ஒன்று!

- மாலதி சுந்தரராஜன்

குன்று தோறாடும் குமரன் கலியுகத்துக் கண்கண்ட தெய்வம்! காமனை எரித்த ஈசனின் நெற்றிக் கண் பொறியிலிருந்து ஆறு உருவாய் அவதரித்து ஓருருவான ஏரகத்திறைவன் கந்தப் பெருமான்! மூவிரு முகங்களும்,ஆறிரு புயங்களும், மூவாறு நயனங்களும் அமைந்த திருமேனி கொண்டவன் அழகன் ஆறுமுகன் !என்றும் இனிமை இளமை, அழகும் உடைய பெருமாளாக உயர்ந்து நிற்பவன் முத்துக் குமரன்!