അല്പം കടുവ കാര്യം

ആ വമ്പനും വസിത്തിയും ഞങ്ങളാ...

- ലക്ഷ്മി ഭാരതി

കാട്ടിലെ രാജാവ് ആരാണ്, സിംഹമാണോ? പക്ഷേ, കേരളത്തിലെ കാടുകളിൽ സിംഹമില്ലല്ലോ. എന്നാൽ സിംഹങ്ങ ളേക്കാൾ വമ്പന്മാരായ മറ്റുചിലർ നമ്മുടെ കാടുകളിലുണ്ട്. ആരാണന്നല്ലേ? അവരാണ് കടുവകൾ. ദേഹമാസകലം ഓറഞ്ചും കറുപ്പും നിറങ്ങളോടുകൂ ടിയ വരകളുള്ള നൂറു മുതൽ ഇരുന്നൂറു കിലോ വരെ ഭാരം വരുന്ന ഭീമാകാരന്മാരായ കടുവകൾ. എന്നാൽ ഇവർ നമ്മുടെ അരുമകളായ പൂച്ചകളുടെ ബന്ധുക്കളാണെന്നു പറഞ്ഞാലോ... അതേ, കടുവകൾ പൂച്ചകളും സിംഹങ്ങളും പുള്ളിപ്പുലികളുമെല്ലാം അടങ്ങുന്ന ഫെലിഡെ കുടുംബത്തി ലെ അംഗങ്ങളാണ്. പാന്തൊറാ ട്രൈഗ്രിസ് (Panthera tigris) എന്നാണു ഇവയുടെ ശാസ്ത്രനാമം.

കാഴ്ചയിൽ ഭീകരരാണെങ്കിലും പൊതുവെ സമാധാനപ്രിയരും ഒറ്റയ്ക്കു ജീവിക്കാൻ ഇഷ്ടപ്പെടുന്നവരുമാണ് കടുവകൾ. വളർച്ചയെത്തിയ ഒരു കടുവ അവയുടെ സ്വതന്ത്ര സഞ്ചാരത്തിനും ഇരതേടലിനും മറ്റുമായി സ്വന്തമായി ഒരു പ്രത്യേകസ്ഥലം തിരഞ്ഞെടുക്കും. ഇതിനെയാണ് ടെറിട്ടറി എന്ന് പറയുന്നത് ഇതിന്റെ പരപ്പളവ് ഏകദേശം 50 ചതുരശ്ര കിലോമീറ്റർ ആണ്. വൃക്ഷങ്ങളിൽ നഖങ്ങൾ കൊണ്ടു പാടുകളുണ്ടാക്കിയും ടെറിട്ടറിയുടെ അതിരുകളിൽ മലമൂത്ര വിസർജനം നടത്തിയും ഒക്കെ ഇത് തന്റെ ഇടമാണെന്ന് അവ മറ്റു കടുവകളെ അറിയിക്കും. ഏതെങ്കിലുമൊരു കടുവ ഈ അതിർത്തി ലംഘിച്ചാൽ പിന്നെ പൊരിഞ്ഞ യുദ്ധമാണ്. യുദ്ധത്തിൽ ജയിക്കുന്നവർക്ക് ആ സ്ഥലം സ്വന്തമാകും. പക്ഷേ പരാജയപ്പെടുന്ന കടുവകൾക്ക് ഗുരുതരമായി പരിക്കേൽക്കും. ചിലപ്പോൾ മരണപ്പെടുകയും ചെയ്യും. പലപ്പോഴും ഇത്തരത്തിൽ പരിക്കേറ്റ് വേട്ടയാടാൻ കഴിയാത്ത കടുവകളാണ് ഗ്രാമങ്ങളിലേക്കും മറ്റും ഇരതേടാനായി വരുന്നത്.