ബ്രേക്കുകൾ മനഃപൂർവമല്ല രാധിക

എന്റെ ഖൽബിലെ വെണ്ണിലാവ് നീ നല്ല പാട്ടുകാരാ... ഇതിപ്പോൾ കേൾക്കുമ്പോഴും മലയാളികളുടെ മനസ്സിലേക്ക് ഓടിവരുന്ന മുഖം ദേഹം മുഴുവൻ കറുപ്പണിഞ്ഞ് അതിനുള്ളിൽ ഒരു പാട് സ്വപ്നങ്ങളും സ്നേഹവും ഒളിപ്പിച്ചുവച്ച റസിയയുടെ മുഖമാണ്. തന്നെ ഇപ്പോഴും റസിയ എന്നുവിളിക്കുന്നവരാണ് കൂടുതലെന്ന് പറയുമ്പോൾ രാധികയുടെ മുഖത്ത് പുഞ്ചിരിയുണ്ട്. അവതരിപ്പിച്ച കഥാപാത്രത്തിന്റെ പേരിൽ അറിയപ്പെടുക എന്നതിലുപരി മറ്റെന്ത് സന്തോഷമുണ്ട്. മഞ്ജുവാര്യർക്കൊപ്പം അഭിനയിച്ച ആയിഷയാണ് രാധികയുടെ ഏറ്റവും പുതിയ വിശേഷം. ആയിഷയെക്കുറിച്ചും ദുബായ് ജീവിതത്തെക്കുറിച്ചും രാധിക സംസാരിച്ചുതുടങ്ങി.

- ബിന്ദു പി.പി

ബ്രേക്കിന് ശേഷം ആയിഷ

അപ്രതീക്ഷിതമായാണ് ആയിഷയുടെ ഭാഗമാവുന്നത്. വലിയൊരു ബ്രേക്കിനുശേഷം മഞ്ജുചേച്ചിക്കൊപ്പം ഒരു മുഴുനീള കഥാപാത്രം ചെയ്യാൻ കഴിഞ്ഞതിന്റെ ത്രില്ലിലാണ്. 2019 ൽ പുറത്തിറങ്ങിയ ഓളിലാണ് എന്നെ എല്ലാവരും അവസാനമായി കണ്ടത്. ഒന്നും മനഃപൂർവ്വമായി എടുത്ത ബ്രേക്കുകളല്ല യാദൃച്ഛികമായി സംഭവിച്ചുപോയതാണ്. ആയിഷയിലെ നിഷ വളരെ  വളരെ   സ്പെഷ്യലാണ്. രൂപത്തിലും ഭാവത്തിലും ഭാഷയിൽ പോലും മാറ്റമുണ്ട്. നിഷ ഒരു തമിഴ് പെൺകുട്ടിയാണ്. ഗദ്ദാമ പോലെയൊരു കഥാപാത്രം. നിഷയെ എല്ലാവരും സ്വീകരിച്ചതിനും സ്നേഹിച്ചതിനും നന്ദിയുണ്ട്.

ആയിഷയിലേക്ക് വിളി വന്നത്

ഒട്ടും പ്ലാൻ ചെയ്യാത്ത സമയത്താണ് ആയിഷ യിലേക്ക് കാൾ വരുന്നത്. ദുബായ് റാസൽ ഖൈമയിലായിരുന്നു ആയിഷയുടെ ഷൂട്ട് നടന്നിരുന്നത്. വിവാഹ ശേഷം ഭർത്താവിനൊപ്പം ദുബായിലാണ് സ്ഥിരതാമസം. ഇവിടെ പുതുമുഖങ്ങൾക്കായുള്ള ഓഡിഷനൊക്കെ നടത്തിയിരുന്നു ആയിഷ ടീം. ആ സമയത്ത് ഞാൻ നാട്ടിലായിരുന്നു. അപ്പോഴാണ് ആയിഷയുടെ ടീം എന്നെ ബന്ധപ്പെടുന്നത്. അവിടെ വന്നുനേരിട്ട് സംസാരിക്കാം എന്നായിരുന്നു ഞാൻ പറഞ്ഞിരുന്നത്. തിരിച്ചു ദുബായ് എത്തി, കഥ കേട്ടപ്പോൾ നിഷ എന്ന കഥാപാത്രം ഇന്ററസ്റ്റിംഗായി തോന്നി. അങ്ങനെയാണ് ആയിഷ കമ്മിറ്റ് ചെയ്യുന്നത്. ഷൂട്ട് എല്ലാം ഇവിടെയായതുകൊണ്ട് കാര്യങ്ങൾ കുറച്ചു കൂടെ എളുപ്പമായി.

ഞാൻ ഇവിടെയൊക്കെ തന്നെയുണ്ട്