അച്ഛന്റെ മകൻ

മലയാള സിനിമയിൽ സംവിധാനരംഗത്ത് തിളങ്ങി നിഥിൻ രൺജിപണിക്കർ

- രജനി കൃഷ്ണ

കുഞ്ഞുന്നാളുതൊട്ട് അച്ഛൻ വഴി, സിനിമയോട് ഒരു ആത്മ ബന്ധം ഉണ്ടായിരുന്നു. അച്ഛന്റെയും അദ്ദേഹത്തിന്റെ സുഹൃത്തുക്കളുടെയും സിനിമകൾ കണ്ടാണ് ഞാൻ വളർന്നത്. അതു കൊണ്ടുതന്നെ സംവിധായകൻ ആകണം എന്ന മോഹം ചെറുപ്പം തൊട്ടേ രക്തത്തിലുണ്ടായിരുന്നു. സിനിമയുടെ തുടക്കം അച്ഛന് ദക്ഷിണ വെച്ചുകൊണ്ടായിരുന്നു. ഭരത്ചന്ദ്രൻ ഐ.പി.എസ്, രൗദ്രം എന്നീ സിനിമകളിൽ അച്ഛന്റെ സംവിധാനസഹായികളിൽ ഒരാളായി ഞാനും കൂടി. അച്ഛനിലെ സംവിധാനമികവും, നേതൃത്വവും ഞാൻ ഒരു പാഠപുസ്തകം എന്നോണം കണ്ടുപഠിച്ചിട്ടുണ്ട്. ലേലം, പത്രം എന്നിവയാണ് അദ്ദേഹത്തിന്റെ സിനിമകളിൽ എന്റെ പ്രിയപ്പെട്ടവ.

സിനിമ സംവിധാനം ചെയ്യണം എന്ന ആഗ്രഹം അച്ഛനോട് പറഞ്ഞപ്പോൾ അദ്ദേഹം തിരികെ ത്തന്നെ ഒരു ഉപദേശം സ്വന്തമായി എഴുതാൻ പറ്റുമെങ്കിൽ മാത്രമേ സിനിമ സംവിധാനം ചെയ്യാൻ ഇറങ്ങാവൂ..' എന്നതായി രുന്നു. ഷാജികൈലാസ് സിനിമക ളിലും പിന്നീട് അസിസ്റ്റന്റ് ഡയറക്ടർ ആയി പ്രവർത്തിച്ചപ്പോൾ, ഒരു ആത്മവിശ്വാസം വന്നു.

അങ്ങനെയാണ് ആദ്യസിനിമയ്ക്ക് വേണ്ടിയുള്ള എഴുത്തുപണികൾ തുടങ്ങിയത്. നിർഭാഗ്യവശാൽ, മനസ്സിൽ ആഗ്രഹിച്ച ആദ്യസിനിമ, പല കാരണങ്ങൾ കൊണ്ട് നടന്നില്ല. പക്ഷേ, പിൻവാങ്ങാൻ മനസ്സ് സമ്മതിച്ചില്ല. രണ്ടാമത് ഒരു സ്ക്രിപ്റ്റിന് വേണ്ടിയുള്ള എഴുത്തു തുടങ്ങി. അതാണ് കസബ.