പ്രമേഹവും മനസ്സും

 ജീവിതശൈലി ക്രമീകരണങ്ങൾ, തുടർച്ചയായി വേണ്ടി വരുന്ന മരുന്നുകൾ, ഇഞ്ചക്ഷൻ, ഇടയ്ക്കിടെയുള്ള രക്ത പരിശോധനകൾ എന്നിവ പ്രമേഹരോഗികളെ മാനസിക സംഘർഷത്തിലാക്കാറുണ്ട്. ഈ സാഹചര്യത്തെ നേരിടാൻ അവർക്ക് പിന്തുണ നൽകേണ്ടതുണ്ട്

- ഡോ.അരുൺബി.നായർ പ്രൊഫസർ സൈക്യാട്രിവിഭാഗം മെഡിക്കൽകോളേജ്, തിരുവനന്തപുരം [e-mail]

ഈ രോഗം കാരണം ഞാൻ വലഞ്ഞു. ഇഷ്ടമുള്ള ഭക്ഷണം കഴിക്കാൻ പാടില്ല. ദിവസം രണ്ടുനേരം ഇഞ്ചക്ഷൻ എടുക്കണം. കോളജിൽ നിന്ന് ടൂർ പോകാൻ പോലും വീട്ടുകാർ സമ്മതിക്കുന്നില്ല.'ടൈപ്പ് 1 പ്രമേഹം ബാധിച്ച പതിനെട്ടുകാരനായ ഒന്നാം വർഷ ബിരുദ വിദ്യാർത്ഥിയുടെ വാക്കുകളാണ് ഇത്. സമാനമായ പ്രയാസമനുഭവിക്കുന്ന ഒട്ടേറെ പ്രമേഹ രോഗ ബാധിതർ സമൂഹത്തിലുണ്ട്. പ്രമേഹം എന്ന രോഗം നിർണയിക്കപ്പെടുന്നതോടെ ആവശ്യമായി വരുന്ന ജീവിതശൈലി ക്രമീകരണങ്ങളും തുടർച്ചയായി വേണ്ടിവരുന്ന മരുന്നുകളും ഇഞ്ചക്ഷനും ഇടയ്ക്കിടെയുള്ള രക്തപരിശോധനയും ഒക്കെ ചെറുതല്ലാത്ത പ്രയാസമാണ് അവർക്ക് ഉണ്ടാക്കുന്നത്. അതുകൊണ്ട് ചിലർക്ക് വല്ലാത്ത മാനസിക സംഘർഷം ഉണ്ടാകാറുണ്ട്.

ഇത്തരം സാഹചര്യങ്ങളെ മാനസികമായി എങ്ങനെ നേരിടണം എന്നത് സംബന്ധിച്ച് പ്രമേഹബാധിതർക്കും കൂടെയുള്ളവർക്കും വ്യക്തമായ അറിവ് ഉണ്ടായിരിക്കണം.

പൊരുത്തപ്പെടാൻ പ്രയാസമുണ്ടായാൽ

പ്രമേഹമുണ്ടെന്ന് അറിയുമ്പോൾ ചിലർക്ക് അതുമായി പൊരുത്തപ്പെടാൻ ചില ബുദ്ധിമുട്ടുകൾ കണ്ടുവരാറുണ്ട്. ഇതിനെ പ്രമേഹവൈഷമ്യം (diabetes distress) എന്നാണ്  പറയുക. ടൈപ്പ് 1 പ്രമേഹ ബാധിതരിൽ 25 ശതമാനം പേരിലും ടൈപ്പ് 2 പ്രമേഹ ബാധിതരിൽ 20 ശതമാനം പേരിലും ഈ അവസ്ഥ ഉണ്ടാകാറുണ്ട് എന്ന് പഠനങ്ങൾ സൂചിപ്പിക്കുന്നു. ഈ അവസ്ഥയുടെ പ്രധാന ലക്ഷണങ്ങൾ ഇവയാണ്: 1. തനിക്ക് പ്രമേഹം ബാധിച്ചതോർത്ത് കഠിനമായ ദേഷ്യവും നിരാശയും അനുഭവപ്പെടുക. പ്രമേഹ പരിചരണം ആവശ്യപ്പെടുന്ന ജീവിതശൈലി ക്രമീകരണങ്ങളെകുറിച്ച് അസ്വസ്ഥത തോന്നുക.

2. പ്രമേഹം നിയന്ത്രിക്കാൻ ആവശ്യമായ കാര്യങ്ങൾ താൻ ചെയ്യുന്നില്ല എന്ന കുറ്റബോധം തോന്നുക. അതേസമയം തന്നെ ആവശ്യമായ മാറ്റങ്ങൾ വരുത്താനുള്ള പ്രചോദനം തോന്നാത്ത അവസ്ഥ.

3. കൃത്യമായ സമയത്ത് രക്തപരിശോധനകൾ നടത്താനും ഡോക്ടറെ സന്ദർശിക്കാനും വിമുഖത കാട്ടുക.

4. അനാരോഗ്യകരമായ ഭക്ഷണശീലങ്ങൾ അവലംബിക്കുക. പ്രത്യേകിച്ചും മാനസികസമ്മർദം അനു ഭവപ്പെടുന്ന സമയത്ത് മധുരവും കൊഴുപ്പും കൂടിയ ഭക്ഷ്യവസ്തുക്കൾ അമിതമായി കഴിക്കുക.

5. ഒറ്റപ്പെട്ടു പോയതായി  തോന്നുക. ആരും തന്നെ മനസ്സിലാക്കാൻ തയ്യാറാകുന്നില്ല എന്ന ചിന്ത.