പല്ലുകളുടെ സൗന്ദര്യം

ശാസ്ത്രവും കലയും സമന്വയിപ്പിച്ചുകൊണ്ട് പല്ലിനും മോണയ്ക്കും നൽകുന്ന ചികിത്സകളാണ് കോസ്മെറ്റിക് ഡെന്റിസ്റ്ററിയിലുള്ളത്. ഇവ പല്ലുകളുടെ സൗന്ദര്യവും ആരോഗ്യവും മെച്ചപ്പെടുത്തും

- ഡോ.വി.പി.പ്രഭാസിങ് പ്രൊഫസർ എച്ച്.ഒ.ഡി.കൺസർവേറ്റീവ്ഡെന്റിസ്റ്ററി അമൃതഡെന്റൽകോളേജ്, കൊച്ചി

നിരയൊത്ത പല്ലുകളുള്ള സുന്ദരമായ പുഞ്ചിരി വ്യക്തികളുടെ ആത്മവിശ്വാസം വളർത്തുന്നതിനും അവരുടെ വ്യക്തിത്വത്തിന്റെ ആകർഷണീയതയ്ക്കും സഹായകരമാണ്. ദന്തചികിത്സാശാസ്ത്രപ്രകാരം പല്ലുകളുടെയും മോണയുടെയും ശരിയായ ആകൃതിയും ആരോഗ്യവും നല്ല പുഞ്ചിരിക്ക് അത്യന്താപേക്ഷിതമാണ്.

പല്ലുകളുടെ സൗന്ദര്യവുമായി ബന്ധപ്പെട്ട ദന്തശാസ്ത്രവിഭാഗമാണ് കോസ്മെറ്റിക് ഡെന്റിസ്റ്ററി. ഇതിൽ ശാസ്ത്രവും കലയും സമന്വയിപ്പിച്ചുകൊണ്ട് പല്ലിനും മോണയ്ക്കുമുള്ള ചികിത്സാപദ്ധതികളാണ് ഉൾപ്പെടുന്നത്.

ഈ ചികിത്സയിൽ പ്രധാനമായും പല്ലുകളുടെ രൂപഭംഗി വർധിപ്പിക്കുന്ന കോംപോസിറ്റ് ഫില്ലിംഗ് (Composite Filling). വെനീറിങ്(Veneering), പല്ലുകളുടെ നിറം വർധിപ്പിക്കുന്ന ബ്ലീച്ചിങ് (Bleaching/Whitening), നിരതെറ്റിയ പല്ലുകളുടെ പുനഃക്രമീകരണത്തിനുള്ള ദന്തക്രമീകരണചികിത്സ (Orthodontics), ഫിക്സഡ് ഓർത്തോഡോണിക്സ് ക്ലിയർ അലൈനർ (Clear Aligner), നഷ്ടപ്പെട്ട പല്ലുകൾ കൃത്രിമ പല്ലുകളുപയോഗിച്ച് പുനർ നിർമിക്കുന്ന ക്യാപ് (Crown/ Cap). ബ്രിഡ് (Bridge). ഇംപ്ലാന്റ (Dental Implant), മോണയുടെ  ആകൃതിയും നിറവും മെച്ചപ്പെടുത്തുന്ന ജിൻജിവെക്ടമി (Gingivectomy), Depigmentation മുതലായ ചികിത്സാരീതികളാ സാധാരണമായി ചെയ്തുവരുന്നത്.

കോസ്മെറ്റിക് ഫില്ലിങ്

പല്ലുകളുടെ ആകൃതിയിൽ ചെറിയ മാറ്റങ്ങൾ വരുത്തൽ, പല്ലുകൾ തമ്മിലുള്ള നേരിയ അകലം, മുൻനിരയിലെ പല്ലുകളിൽ വരുന്ന കേടുകൾ, പല്ലുകളിലെ പൊട്ടലുകൾ എന്നീ അവസ്ഥകൾക്കുള്ള ചികിത്സാരീതിയാണ് കോസ്മെറ്റിക് ഫില്ലിങ് അഥവാ കോംപോസിറ്റ് ഫില്ലിങ് (Composite Filling). പല്ലിന്റെ ഭാഗങ്ങൾ ഒട്ടും തന്നെ നീക്കം ചെയ്യാതെ, ഒറ്റ സിറ്റിങ്ങിൽ ചെയ്യാവുന്ന ചികിത്സാരീതിയാണിത്.