Kitchen 2023

അടുക്കളയുടെ ഡിസൈൻ, മെറ്റീരിയൽ, ഉപകരണങ്ങൾ തുടങ്ങിയവയിലെ പുതിയ വിശേഷങ്ങൾ അറിയാം !

വീടുകളിൽ കാലത്തിനു നേരെ പിടിച്ചൊരു കണ്ണാടിയാണ് അടുക്കള, കോവിഡിന്റെ വരവോടെ ഭാര്യയും ഭർത്താവും ഒരുമിച്ചു ഭക്ഷണം പാകം ചെയ്യുകയും ഒരുമിച്ചിരുന്നു കഴിക്കുകയും ചെയ്യുന്ന ശീലം കൂടിയതോടെ അടുക്കളയും അതനുസരിച്ചു മാറി. ഡൈനിങ്ങിനോടും അതിലുപരി ഫാമിലി ലിവിങ്ങിനോടും അടുക്കള കൂടുതൽ അടുത്തു. ഇടയിലുള്ള വേർ തിരിവുകൾ കുറച്ചുകൂടി നേർത്തതായി. വീടിന്റെ ഹബ്' എന്ന വിശേഷണമാണ് ഇന്ന് അടുക്കളയ്ക്കിണങ്ങുക. അടുക്കളയ്ക്ക് ചുറ്റുമായി വീടിന്റെ ഡിസൈൻ ഉരുത്തിരിയുന്നതാണ് 2023 ലെ കാഴ്ച.

പൊതുചട്ടക്കൂടിൽ ഒതുങ്ങില്ല

ഉപകരണങ്ങൾക്ക് അടുക്കോടെയും ചിട്ടയോടെയും സ്ഥാനം വേണ്ടുവോളം സ്റ്റോറേജ് സൗകര്യം, വൃത്തിയാക്കാനുള്ള എളുപ്പം. കാര്യക്ഷമവും അതേസമയം ഭംഗിയുള്ളതുമാകണം അടുക്കള. ഇക്കാര്യത്തിൽ ആർക്കും തർക്കമില്ല. എന്നാൽ, ഈ മാനദണ്ഡങ്ങൾക്കനുസരിച്ച് ഒരു പൊതുചട്ടക്കൂട് നിശ്ചയിക്കാനൊട്ട് കഴിയുകയുമില്ല. അതാണ് പുതിയ അടുക്കളകളുടെ പ്രത്യേകത. ഓരോ വീട്ടുകാരുടെയും ഇഷ്ടങ്ങൾക്കനുസരിച്ച് എന്തു മാറ്റങ്ങൾ വേണമെങ്കിലും വരാം. മുൻപ് വീട്ടമ്മയുടെ പേഴ്സനലൈസ്ഡ് സ്പേസ്' ആയിരുന്നെങ്കിൽ ഇന്ന് വീട്ടുകാരുടെ മുഴുവൻ ഇഷ്ടങ്ങളാണ് അടുക്കളയിൽ പ്രതിഫലിക്കുന്നത്. ഇങ്ങനെ മതി' എന്ന മുൻവിധിയോടെയുള്ള സമീപനം ഇവിടെയില്ല. പുതിയ അടുകളകളിൽ എന്തും പ്രതീക്ഷിക്കാം.

സ്ട്രെയിറ്റാണ് ഡിസൈൻ

ഓപ്പൻ ആയാലും സെമി ഓപ്പൻ ആയാലും സ്ട്രെയിറ്റ് ലൈൻ ഡിസൈനിലുള്ള അടുക്കളയോടാണ് ബഹുഭൂരിപക്ഷത്തിനും താൽപര്യം. ഇടയ്ക്ക് പ്രത്യക്ഷപ്പെട്ട "സ്മൂത്ത് കർവ് ഡിസൈനിന് കേരളത്തിൽ കാര്യമായ ചലനമുണ്ടാക്കാനായില്ല. ക്ലീൻ യിറ്റ് ലൈൻ ഡിസൈനിൽ മിനിമലിസ്റ്റിക് മുഖച്ഛായയുള്ള അടുക്കളകൾ തന്നെയാണ് ഇപ്പോഴത്തെ സൂപ്പർ താരങ്ങളെങ്കിലും കൊളോണിയൽ സ്റ്റൈൽ പോലെ വേറിട്ട കാഴ്ചകളും ഇഷ്ടം പോലെയുണ്ട്. കാബിനറ്റിന്റെ വാതിലുകളിലും ഫർണിച്ചറിലുമൊക്കെയുള്ള ഗ്രൂവ്'ഡിസൈനും ഡെക്കറേറ്റീവ് മൂഡിലുള്ള വാതിൽപിടികളുമൊക്കെയാണ് ഈ ശൈലിയുടെ പ്രത്യേകത. മലബാർ മേഖലയിലാണ് ഇത്തരം അടുക്കളകൾക്ക് ആരാധകർ കൂടുതൽ.