കാലത്തിനൊപ്പം ഒരു യാത്ര

വേണമെങ്കിൽ ഈ പ്ലാൻ പിന്തുടരാം. അതല്ലെങ്കിൽ പുതിയതൊന്ന് തയാറാക്കാം. ഇതായിരുന്നു സൃഹൃത്തിന്റെ വാക്കുകൾ

ശിൽപിക്ക് തന്റെ നിർമിതി മറക്കാനാകുമോ? മറക്കാനാകുന്ന നിർമിതികളും ഓർമിക്കപ്പെടേണ്ടതല്ലേ? ഈ രണ്ടു ചോദ്യങ്ങൾക്കു നടുവിലാണ് ഞാനിപ്പോൾ ഏറ്റവും ഇഷ്ടപ്പെട്ട അല്ലെങ്കിൽ മറക്കാനാകാത്ത ഒരു നിർമിതി ചൂണ്ടിക്കാണിക്കുക എന്നെ സംബന്ധിച്ച് ഒട്ടും എളുപ്പമല്ല. എങ്കിലും ഒരു വീടിന്റെ കഥ ഞാൻ പറയാം. ഞാൻ ചെയ്യാത്ത എന്നാൽ, എന്റേതു മാത്രമായ ഒരു നിർമിതിയുടെ കഥ. ജീവിതത്തിലെ ആകസ്മികതകളും പ്രവചനാതീത പ്രകൃതവുമെല്ലാം ഇഴചേരുന്ന ഒരു കഥ.

38 വർഷം മുമ്പാണ്. സിഇടിയിൽ നിന്ന് ആർക്കിടെക്ചർ പഠനം പൂർത്തിയാക്കി കുറേനാൾ വിദേശത്ത് ജോലി നോക്കിയ ശേഷം നാട്ടിലെത്തി പ്രാക്ടീസ് ആരംഭിച്ച സമയം. ഒരു ദിവസം എന്റെ സഹപാഠി എന്നെ കാണാനെത്തി. ഗൾഫിൽ എൻജിനീയറാണദ്ദേഹം. നാട്ടിൽ ഒരു വീടു വയ്ക്കണം. അതാണ് ആവശ്യം. വീടിന്റെ പ്ലാൻ സഹിതമാണ് അദ്ദേഹം വന്നത്. ഗൾഫിൽ അദ്ദേഹത്തിനൊപ്പം ജോലി ചെയ്തിരുന്ന സ്പെയിൻകാരനായ ആർക്കിടെക്ട് വരച്ചു നൽകിയതായിരുന്നു ആ പ്ലാൻ. പക്ഷേ, അത് പൂർത്തിയായിരുന്നില്ല; പ്ലാൻ മുഴുമിപ്പിക്കും മുൻ പ് മരണം ആ ചെറുപ്പക്കാരനെ കൂട്ടിക്കൊണ്ടു പോയി.