സാധാരണക്കാർക്കൊപ്പം നിധി കമ്പനികൾ

നിക്ഷേപത്തിന് ഉയർന്ന പലിശ അത്യാവശ്യത്തിനു വായ്പ

അധ്വാനിച്ചുണ്ടാക്കുന്നതിൽ നിന്നു മിച്ചം പിടിക്കുന്ന തുകയ്ക്ക് ന്യായമായ പലിശ കിട്ടുക, പണത്തിന് അത്യാവശ്യം വന്നാൽ ബുദ്ധിമുട്ടില്ലാതെ വായ്പ ലഭിക്കുക. ഏതു സാധാരണക്കാരന്റെയും ഈ രണ്ട് ആവശ്യങ്ങൾക്കൊപ്പം നിന്നു ശ്രദ്ധനേടുകയാണ് നിധി കമ്പനികൾ.

'നിധി കമ്പനികൾ' എന്ത്? എങ്ങനെ?

ബാങ്കിതര സാമ്പത്തിക സ്ഥാപനമാണെങ്കിലും നിധി കമ്പനികൾക്കുമേൽ ആർബിഐ നിയന്ത്രണം ഇല്ല. പകരം കമ്പനി നിയമപ്രകാരമാണ് പ്രവർത്തനം. ഓഹരി ഉടമകളായ അംഗങ്ങളിൽനിന്നു നിക്ഷേപം സ്വീകരിച്ച് ആ തുക, മതിയായ ഈടുവാങ്ങി അംഗങ്ങൾക്കിടയിൽ മാത്രം വായ്പയായി വിതരണം ചെയ്യുക എന്നതാണ് പ്രവർത്തനരീതി. 18 വയസ്സ് പൂർത്തിയായ ആർക്കും 10 രൂപയുടെ ഓഹരിയെടുത്തു നിധി കമ്പനികളിൽ അംഗത്വം നേടാം. നിക്ഷേപം തുടങ്ങാൻ 10 ഓഹരികളിലെങ്കിലും നിക്ഷേപിച്ചിരിക്കണം.