മഞ്ഞിൽ പൊതിഞ്ഞ ക്രിസ്മസ്

മഞ്ഞുവീണ വഴികളും തണുപ്പും നിറഞ്ഞ ക്രിസ്മസ് രാവുകൾ. ഇന്ത്യയുടെ വടക്കുകിഴക്കൻ സംസ്ഥാനങ്ങളിൽ ഈ നാളുകളിൽ വേറിട്ടതാണ് ആഘോഷങ്ങൾ...

- കെ.ആർ. ഔസേഫ്

ക്രിസ്മസ് ലോകം മുഴുവൻ ഉത്സവപ്രതീതി തീർക്കുമ്പോൾ ഇന്ത്യയിലെ വടക്കുകിഴക്കൻ സംസ്ഥാനങ്ങളായ മേഘാലയ, നാഗാലാൻഡ്, മണിപ്പൂർ, മിസോറം, അരുണാചൽ പ്രദേശ്, അസം, ത്രിപുര എന്നിവിടങ്ങളും ആഘോഷത്തിമിർപ്പിലാകും.

രാവിലെ അഞ്ചോടെ വെളിച്ചം പരക്കുകയും വൈകീട്ട് നാലിനുതന്നെ ഇരുട്ട് മൂടുകയും ചെയ്യും ഇവിടെ. പച്ച പുതച്ച മലഞ്ചെരിവുകളും കൊച്ചുകുന്നുകളും ഇവക്കിടയിൽ തെളിഞ്ഞുകിടക്കുന്ന ചെറിയ തടാകങ്ങളും. ശരീരം തുളച്ചുകയറുന്ന തണുത്ത കാറ്റും മൂടൽമഞ്ഞും പൊടിക്കാറ്റിൽ പെയ്തിറങ്ങുന്ന മഞ്ഞുമഴകളുംകൊണ്ട് വേറിട്ട ഒരിടം. പാശ്ചാത്യ ക്രിസ്മസ് കഥകളിലെ വിവരണങ്ങളെ ഓർമിപ്പിക്കുന്ന അനുഭൂതിയാണ് ഇവിടങ്ങളിൽ.

ഇനിയും വൈദ്യുതി എത്താത്ത ഗ്രാമങ്ങളിൽ മങ്ങിക്കത്തുന്ന മണ്ണണ്ണവിളക്കുകൾ. ഇപ്പോൾ കുറെ സ്ഥലങ്ങളിലെങ്കിലും സോളാർ വിളക്കുകൾ പാതി മങ്ങിക്കത്തുന്നുണ്ട്. പുലർ കാലത്ത് ചെറിയ മഞ്ഞിൻകണങ്ങൾ നിറഞ്ഞ മരച്ചില്ലകളിൽ വെയിൽ കായുന്ന പക്ഷികൾ. പുറത്തിറങ്ങാൻ മടിച്ച് കൂട്ടിൽ തന്നെ തിരിയുന്ന ആട്ടിപറ്റം. മണ്ണ് കൊണ്ടുണ്ടാക്കിയ ചെറിയ ആട്ടിൻ കൂടുകളും കോഴിക്കൂടുകളും പ്രഭാതത്തിൽ ശബ്ദമാനമാകുന്നു.

പ്രകൃതിതന്നെ ഒരുങ്ങുമ്പോൾ

മണിപ്പൂരിൽ നവംബറിന്റെ പാതിയി ൽ തുടങ്ങുന്ന മഞ്ഞും തണുപ്പും. ഇല പൊഴിയുന്ന മരങ്ങൾ. തടാകങ്ങൾ തണുത്തുറഞ്ഞ നിലയിലാണ്. ഡിസം ബറിൽ തണുപ്പ് കഠിനമാകും. കമ്പിളി വസ്ത്രങ്ങളില്ലാതെ പുറത്തിറങ്ങാൻ കഴിയാത്ത അവസ്ഥ.

രാത്രി തീകായുന്ന ഗ്രാമങ്ങൾ മൂടൽ മഞ്ഞിന്റെ പുകമറക്ക് പുറത്തേക്ക് മഞ്ഞപ്രകാശം പരത്തും. രാത്രിക്ക് നീളം കൂടുന്നതു പോലെ. മഞ്ഞിൻ പുതപ്പുകൊണ്ട് മൂടുന്ന മരങ്ങളും പുല്ല് മേഞ്ഞ മൺകുടിലുകളും പ്രഭാതത്തിലെ മനോഹര കാഴ്ചയാണ്.