പങ്കുവെക്കുന്നു നമ്മെ തന്നെ

കൈ വെള്ളയിൽ ഒതുങ്ങുന്ന ഫോണു കളിൽ കണ്ണാഴ്ത്തി ഇരിക്കവേ അതിനുള്ളിൽ നാം കാണുന്നതും വായിക്കുന്നതുമാണ് ലോകമെന്ന് തോന്നിപ്പോകുന്നുണ്ടോ?

മുൻപെവിടെയോ വായിച്ച ഒരു കഥയാണ് സ്കൂൾ വിട്ട് എത്തണ്ട നേരം കഴിഞ്ഞിട്ടും മകൾ വീട്ടിൽ എത്തിയില്ല. തിരക്കിച്ചെല്ലുമ്പോഴുണ്ട് കൂട്ടുകാരിയുടെ കൂടെ ചിരിച്ചും കഥകൾ പറഞ്ഞും വരുന്നു അവൾ.

രണ്ടുപേരെയും അത്രമേൽ സന്തോഷത്തിൽ അതിനു മുൻപ് കണ്ടിട്ടേയില്ല. വൈകിയ കാര്യം തിരക്കിയപ്പോൾ പറഞ്ഞു അവളുടെ കളിപ്പാട്ടം പൊട്ടിപ്പോയി, ഞാൻ സഹായിക്കുകയായിരുന്നു

'ആഹാ, ഒരു കളിപ്പാട്ടം നന്നാക്കാനൊക്കെ അറിയുമോ?

മറുപടി കേട്ടപ്പോൾ മനംകുളിർന്നു പോയി.

'കളിപ്പാട്ടം എങ്ങനെ ശരിയാക്കും എന്നറിയാതെ കൂട്ടുകാരി കരയുകയായിരുന്നു. ശരിപ്പെടുത്താനുള്ള വിദ്യയൊന്നും എനിക്കും അറിയില്ല, ഞാനും അവൾക്കൊപ്പം നിന്ന് കരഞ്ഞു!