માણસ બદલાય છે, સુધરે પણ છે!

એક સમયે જ્યારે તમે બૂમો પાડી પાડીને તમારા પ્રિયપાત્રને કશુંક સમજાવવા માગ્યું હોય કે તેમની પાસેથી અમુક પ્રકારના વર્તનની અપેક્ષા રાખી હોય, ત્યારે તેમણે તમારા માટે એ ના કર્યું હોય, પરંતુ તમારા પછી આવેલા સાવ નવા જ પાત્રને બધું જ માગ્યા વિના આપી દેતાં જુઓ ત્યારે મનમાંથી એક ટીસ તો ચોક્કસ ઊઠે કે તમારી લાગણીઓમાં એવી શું કમી રહી ગઈ કે એવો પ્રેમ એ તમને ના આપી શક્યા?!

- ડો. મિતાલી સમોવા

સહ્યાદ્રિએ નિક્કીને ફોન કરીને ફટાફટ રિવરફ્રન્ટ બોલાવી લીધી. નિક્કીને એમ કે સહ્યાદ્રિને પાછો પૅનિક ઍટેક શરૂ થયો હશે, એ પાછી કોઈ આડુંઅવળું પગલું ન ભરી લે, એટલે એ ઑફિસથી ભરબપોરે દોડતી આવી. રિવરફ્રન્ટની પાળ પર બેસીને સહ્યાદ્રિ શેકેલી સિંગ ખાતાં ખાતાં ઊંડું વિચારી રહી હતી. નિક્કીએ પૂછ્યું કે આટલું બધું શું અરજન્ટ હતું? તો સહ્યાદ્રિએ કહ્યું, ‘નિક્કી, તને આરુષ યાદ છે?’ નિક્કીએ કહ્યું કે, ‘યાદ હોય જ ને. તારો સાત વર્ષ બોયફ્રેન્ડ રહેલો. જેની સાથેના બ્રેકઅપ પછીથી તો તું આ વારંવાર પૅનિક ઍટેકની બીમારીથી પીડાય છે, સાઇકિયાટ્રિસ્ટની દવા ખાય છે. એને તો કેવી રીતે ભૂલી શકું હું!' નિક્કીના શબ્દો સાથે આંખોમાં પણ આક્રોશ ઝળકી ઊઠ્યો. એ સત્ય જ છે કે તમારા સૌથી અંગત માણસો તે પરિવારના હોય કે મિત્રો, તેમને તમારી સાથે ખોટું કરનાર વ્યક્તિ પ્રત્યે તમારા પોતાના કરતાં વધુ નફરત અને નારાજગી થતી હોય છે. નિક્કીનું પણ એવું જ હતું. સહ્યાદ્રિ ફરી બોલવા લાગી.

‘હમણાં એનો જૂનો પાકો ભાઈબંધ સનમ મળેલો. એણે કહ્યું કે, પાંચ વર્ષ પહેલાં મારી સાથે જ્ઞાતિનું કારણ આગળ ધરીને છૂટો પડેલો આરુષ બે વર્ષ પહેલાં એક બીજી જ્ઞાતિની છોકરીને પરણી લાવ્યો છે. તે છોકરી માટે આરુષ તેનાં મમ્મી-પપ્પા સાથે પણ લડી પડેલો. છ મહિના લગ્ન પછી અલગ રહેલો. અત્યારે સારું છે, ભેગાં રહે છે, પણ તે છોકરીને આરુષ બહુ સારી રીતે રાખે છે, તેમનો એક દીકરો પણ છે. મને નવાઈ લાગી કે આ એ જ આરુષ છે જે તેનાં મમ્મીનો એક ફોન આવતા ગભરાઈ જતો અને અમારી ડેટ અધવચ્ચે છોડીને જતો રહેતો? તેનાં મમ્મીએ આત્મહત્યા કરવાની ધમકી આપેલી એટલે એ લાગણીમાં તણાઈને અમારી સાત વર્ષની રિલેશનશિપ તોડીને જતો રહ્યો હતો અને તે પછી એક વાર પણ મારો સંપર્ક કરવાનો પ્રયત્ન નહોતો કર્યો. એ જ છોકરો કોઈ બીજી સાવ નવી છોકરી, જે મારા કરતાં અડધો સમય પણ તેની સાથે ના રહેલી હોય તેના માટે મમ્મી-પપ્પા સાથે લડી લે એ મને માન્યમાં આવતું નથી, નિક્કી! આ તો એવું જ થયું ને કે મારા પ્રેમમાં ક્યાંક કચાશ રહી ગઈ?!’