‘પિન્ટુને ચારેચાર ABCD બોલતાં તો આવડશે ને?’

લોકો તો એક જ વાર મેટ્રિકની પરીક્ષા આપી નીકળી જતા હોય છે, મેં તો ત્રણ ત્રણ વાર આપી છે, આ તો પિન્ટુડાના પપ્પાની આબરૂ ખાતર મેં ચોથી વાર પરીક્ષા આપી નહીં.’

- હર્ષદ પંડ્યા ‘શબ્દપ્રીત’

આજે મોટા ભાગની ગુજરાતી મમ્મીઓ એમનાં ટાબરિયાંઓને બાલમંદિરમાં દાખલ કર્યા પછીના બીજા જ મહિને ઉઘરાણી કરતી થઈ જાય છે કે, ગામનાં બીજાં બધાં ટાબરિયાંઓને તો ચારે ચાર ABCD બોલતાંય આવડી ગઈ છે અને આ અમારા પિન્ટુડાને તો હજુ પહેલી ‘A B C D’ યે બોલતાં નથી આવડતી? આમ કેમ?

ત્યારે એ બાલમંદિરનાં પ્રૌઢ બહેન એમના અનુભવોની ભાષામાં સમજાવે, ‘ના આવડે બહેન, સારું શીખતાં વાર લાગે.’

‘પણ ઘરમાં તો એના પપ્પાની સામે એ ‘અ, આ, ઈ, એ, ઉ, આં...’ જેવું ઘણું બધું બોલતો હોય છે!’

‘એના પપ્પાની હાજરીમાંને?’

‘હા.’ ‘પણ અમારો અહીંનો સ્ટાફ એટલો બધો બિહામણો નથી કે એ ‘આ, ઈ, એ, ઉ, આં’ કરવા મંડી પડે. તમે ધીરજ રાખો બહેન, તમારા પિન્ટુને છ મહિના થવા દો.… એને એવું બધું અને એટલું બધું આવડી જશે કે તમને પણ અહીં દાખલ થઈ જવાનું મન થશે!’

‘તમે છ મહિનાની વાત કરો છો? પણ મારા પિન્ટુડાને તો ગયા જૂનની ત્રીસમી તારીખે બે વરસ પૂરાં થવા આવ્યાં... એ કંઈ છ મહિનાનો નથી મૅડમ.’

‘વાહ, તમારામાં કૉમનસેન્સ તો બહુ જ સારી છે બહેન!’

‘તે હોય જ ને, લોકો તો એક જ વાર મેટ્રિકની પરીક્ષા આપીને નીકળી જતા હોય છે, મેં તો ત્રણ ત્રણ વાર આપી છે, આ તો પિન્ટુડાના પપ્પાની આબરૂ ખાતર મેં ચોથી વાર પરીક્ષા આપી નહીં.’

‘તમારા મિસ્ટરની આબરૂ ખાતર?’

‘હા, એ અમારા આમ ભોળા બહુ... મને કહે, હવે ચોથી વાર તારે મેટ્રિકની પરીક્ષા આપવી નથી. ભૂલથી પાસ થઈ જાય તો સમાજના લોકોને પહોંચી ન વળાય - સમાજ તો એવું જ કહેતો રહેવાનો ને કે મિસ્ટર નૉનમેટ્રિક અને મિસિસ મેટ્રિક? બસ, એમની આબરૂ ખાતર મૅડમ, મેં ચોથી વાર પરીક્ષા ન આપી... એટલે તમે હમણાં કહ્યું ને કે મારામાં કૉમનસેન્સ બહુ જ સારી છે - એ તમારી વાત સાચી છે. પેલું અંગ્રેજીમાં કંઈક બોલાય છે ને કે - પ્રેક્ટિસ મેક્સ મેન પરફેક્ટ!’

‘અરે વાહ! તમે તો અંગ્રેજીમાં પણ બોલી શકો છો ને કાંઈ!’

‘એટલે સ્તો.. ! એટલે જ આ પિન્ટુડાને મેં તમારે ત્યાં અંગ્રેજી મિડિયમમાં ભણવા મૂક્યો છે, પણ જુઓને, બે મહિના થવા આવ્યા છતાં એ, ‘A B C D’ સુધી નથી પહોંચ્યો... '