રાણીની રમૂજ

રાણી વિશે એટલે ગરિમા અને સત્તાનો કડપ. ૯૬ વર્ષની પાકટ વયે અવસાન પામેલાં, બ્રિટિશ તાજધારી, ચર્ચ ઑફ ઇંગ્લેન્ડમનાં સુપ્રીમ ગવર્નર અને કોમનવેલ્થનાં વડાં એવાં રાણી એલિઝાબેથ (દ્વિતીય) આ છબિથી વિપરીત એવી વિશિષ્ટ રમૂજવૃત્તિ ધરાવતાં હતાં. આ લેખમાં તેમનાં આ પાસાંનો પરિચય કરાવવામાં આવ્યો છે.

- બીરેન કોઠારી

ઈશ્વર (આદમને): મેં તારા માટે ઈવનું તેમ જ આ પ્રાણીઓનું સર્જન કર્યું, જેથી તને એકલવાયું ન લાગે.

આદમ (તળાવમાં દેખાતી રાણી એલિઝાબેથ તરફ જોઈને): તો પછી તળાવમાં પેલું કોણ છે? ઈશ્વર: ખબર નથી. હું અહીં આવ્યો ત્યારે એ ત્યાં જ હતી.

અણુવિસ્ફોટ પછી ટકી જનારી ચીજો: વંદો, ટાર્ડીગ્રેડ (એક જાતનું પ્રાણી), ઈ.કોલાઈ (એક જાતનો બૅક્ટેરિયા) અને રાણી એલિઝાબેથ.

તમામ ડાયનોસોરનો અવકાશી ગોળા વડે થયેલો વિનાશ નિહાળી રહેલાં રાણી એલિઝાબેથ.

સવાલઃ પ્રિન્સ ચાર્લ્સને રાજા બનવા દેવા માટેનું તમારું કોઈ આયોજન ખરું?

રાણી એલિઝાબેથઃ સૉરી. તમારો સવાલ બરાબર સંભળાયો નહીં.

સવાલ: ઓકે. હું સવાલનું પુનરાવર્તન કરું છું.

રાણી એલિઝાબેથઃ જરૂર નથી. એના પછીનો સવાલ પૂછો.

આ અને આવાં અનેક મીમ ૮ સપ્ટેમ્બર, ૨૦૨૨ના રોજ ૯૬ વર્ષની પાકટ વયે જેમનું અવસાન થયું એવાં, ઇંગ્લેન્ડનાં રાણી એલિઝાબેથ (દ્વિતીય) વિશે પ્રચલિત બની રહેલાં. તેમનું દીર્ઘાયુષ્ય, શારીરિક અને માનસિક સ્વસ્થતા વ્યાપક રમૂજનો વિષય બની રહ્યાં હતાં. વધતી જતી વયનો પ્રભાવ એવો હોય છે કે એ તમામ અવતરણો કે વિચારણાઓને ખોટા પાડી શકે છે. ૯૬ વર્ષીય રાણીના અતિ દીર્ઘ જીવનમાં યુગ પરિવર્તનની અનેક ઘટનાઓના સાક્ષી બનવાનું આવ્યું, એમ પારિવારિક જીવનમાં પણ અનેક વિપરીત પરિસ્થિતિઓનો સામનો કરવાનો આવ્યો. આમ છતાં, તેમણે સંતુલન ગુમાવ્યું નહીં. તેમના જીવન વિશે કેવળ ટૂંકમાં જ ઉલ્લેખ કરીએ.