અનુરાગ કશ્યપ જ્યારે બોલે છે..

અમુક કલાકાર - કસબીઓની ફિલ્મની સાથે તેમના ઇન્ટરવ્યૂઝ જોવાની પણ એટલી જ મજા પડે. અનુરાગ કશ્યપ પણ એમાંના એક. તેમણે બૉલિવૂડના ખરાબ સમય ઉપર રસપ્રદ તારણો કાઢ્યા છે અને કારણો આપ્યા છે. થોડા દિવસો પહેલાં ૪૯ના થયેલા કશ્યપ સંગાથે થોડું મનોમંથન આપણે પણ કરીએ!

- પાર્થ દવે

અનુરાગ કશ્યપની છેલ્લે સ્પેનિશ ફિલ્મ ‘મિરાજ’ની સત્તાવાર રિમેક ‘દોબારા’ રિલીઝ થઈ અને ખોવાઈ ગઈ! પણ તે દરમિયાન તેણે આપેલા ઇન્ટરવ્યૂ ભારે રસપ્રદ રહ્યા. આફ્ટર ઓલ, અનુરાગ કશ્યપ પાથ બ્રેકિંગ ડિરેક્ટર છે. તેણે રાજકુમાર રાવથી શરૂ કરીને; વાયા જયદીપ અહલાવત અને પંકજ ત્રિપાઠીથી લઈને નવાઝુદ્દીન સિદ્દીકી સુધીના એક્ટર્સ આપ્યા છે, ‘ગેન્સ ઓફ વાસેપુર' અને ‘ગુલાલ' જેવી ફિલ્મો આપી છે. તે પોતે દુનિયાભરની ફિલ્મો જુએ છે, ફેસ્ટિવલ્સ ફરે છે, લોકોને મળે છે.

જોકે, હમણાં હમણાં અનુરાગે હિન્દી સિનેમા જોવાનું ઓછું કરી નાખ્યું છે. (આમ તો બધાએ ઓછું કરી નાખ્યું છે!) તેનું કારણ આપતા તે કહે છે, ‘પાછલા થોડા સમયથી મને હિન્દી ફિલ્મો એન્ગેજ નથી કરતી. હું તમિળ અને મલયાલમ ફિલ્મો જોતો હોઉં છું. મારા આસિસ્ટન્ટ મને કહી દે કે મુંબઈના કયા પરામાં, કયા થિયેટરમાં સબટાઇટલ્સ સાથે રિજનલ ફિલ્મ લાગી છે!’

અનુરાગ કશ્યપની જેમ આજે કેમ લોકો દક્ષિણ ભારતની ફિલ્મો તરફ વળ્યા છે? અત્રે અમૃત ઘાયલ’ની એક પંક્તિ યાદ આવે છેઃ

‘જીવન જેવું જીવું છું, એવું કાગળ પર ઉતારું છું

ઉતારું છું, પછી થોડું ઘણું એને મઠારું છું.

તફાવત એ જ છે, તારા અને મારા વિશે જાહિદ!

વિચારીને તું જીવે છે, હું જીવીને વિચારું છું.