હવે મારે ગ્રે શેડ્સવાળા પાત્રો ભજવવા છે!

એમબીએ થયેલા માનવ ગોહિલ માર્કેટિંગનો બિઝનેસ કરી રહ્યા હતા અને એક ગુજરાતી અને માર્કેટિંગના વિધાર્થી તરીકે તેમને તેમનો બિઝનેસ ડેવલપ કરવો હતો

'કહાની ઘર ઘર કી’નો વિક્રમ, ‘કુસુમ’નો ‘વિશાલ મહેરા’, ‘કસૌટી ઝિંદગી કી'નો પ્રવીણ સેનગુપ્તા. આ પાત્રો સિરિયલ્સના રસિયાઓ માટે અજાણ્યા નથી. ટેલિવિઝનનો જે એકતા કપૂરયુગ ચાલી રહ્યો હતો, ત્યારની વાત છે. આ પાત્રો ભજવનાર અભિનેતા એટલે માનવ ગોહિલ!

માનવ ગોહિલે એકાધિક એવાં પાત્રો ભજવ્યા છે, જે એકદમ સુંવાળા હોય! જે કોઈનું ખરાબ ન કરે. થોડા દિવસો પહેલાં થયેલી મુલાકાતમાં તેઓ વાતની શરૂઆત કરતાં કહે છે, ‘મેં આખું જીવન એવા ગુડ ગુડ પાત્રો કર્યાં છે જે છોકરીઓને ગમે. છોકરીઓની મમ્મીઓને ગમે! હવે મારે ગ્રે શેડ્સવાળા પાત્રો ભજવવા છે.'

માનવ ગોહિલની આ ઇચ્છા પૂરી થતી હોય તેમ, તેમની આગામી સિરીઝ ‘મત્સ્ય વેધ' નામક છે, જેમાં તેઓ ગ્રે શેડ પાત્ર ભજવી રહ્યા છે.