મેં સપનેય ધાર્યું નહોતું કે હું કદી લેખક બનીશ!

બાળપણથી જ વાંચનનો શોખ પરંતુ લેખક, અધ્યાપક બનવાનું સપને પણ તેમણે વિચાર્યું નહોતું. જાણીતાં લેખિકા વિવેચક, અનુવાદક અને સંપાદક શરીફા વીજળીવાળા અંતરનાદને અનુસરીને જીવનના આ મુકામ પર કઈ રીતે પહોંચ્યાં? એમના જ શબ્દોમાં પ્રસ્તુત છે.

- શરીફા વીજળીવાળા

આમ તો કોઈનુંય જીવન સાવ સીધી લીટીએ ભાગ્યે જ ચાલતું હોય છે. સાવ સીધી લીટીએ જીવનારા અભાગિયાઓને જીવવાની શી મજા આવતી હશે એ તો રામ જાણે ! પણ હા, જીવનના દરેક વળાંક અંદરના અવાજથી (અંતરનાદથી) જ આવે એવું નથી હોતું. ક્યારેક જરૂરિયાત, ક્યારેક લાચારી તો ક્યારેક અંતરનાદ તમને જાપાન જતાં હો ને ચીન લઈ જાય એવું બને. મારે તો આજ સુધી એવું થતું જ રહ્યું છે. આમેય ઘરમાં બધા મને કઠણ કપાળની કહે. જિંદગીમાં કદી કંઈ આસાનીથી હાંસલ નથી થયું. કાયમ ભીંત સાથે માથું અફાળીને જ રસ્તા કાઢવાના થયા અને એના કારણે જિંદગી રસ્તા બદલતી જ રહી છે.