યુવા પેઢીની ફૂડ હેબિટ કેવી છે?

બદલાતા સમય સાથે રહેણીકરણી, ખાનપાન, આદતો બધું જ બદલાઈ રહ્યું છે. વિશ્વમાં થઈ રહેલા બદલાવોની સૌથી વધુ અસર યુવાનો પર થઈ છે એવું મનાય છે, કારણ કે બહારની દુનિયા સાથે તેઓ વધુ જોડાયેલા છે. ખાસ કરીને છેલ્લા કેટલાક સમયથી આપણી ખાણીપીણીની આદત બદલાઈ છે ત્યારે જોઈએ કે આજના યુવાનોને શું ખાવું ગમે છે.

- આર્જવ પારેખ

અરરર.. આવું તે કંઈ ખવાતું હશે? આજના યુવાનોને તો બહારનું ખાવું જ ગમે છે. યુવાનો બગડી ગયા છે.. વગેરે જેવા અનેક સંવાદો તમે રોજબરોજ સાંભળતા હશો. અહીં આપણે શું ખાવું કે શું ન ખાવું એ વિવાદમાં નહીં પડીએ અને સુફિયાણી સલાહો નહીં આપીએ, પરંતુ આપણે વાસ્તવિકતા તરફ ધ્યાન આપીશું. દરેક દેશ માટે યુવાધન એ તેમની વસ્તીનું સૌથી અગત્યનું અંગ ગણાય છે. કોઈ પણ દેશ માટે યુવાનો એ ભવિષ્યના સર્જનહાર છે. એમાંય હાલમાં ભારત તો સૌથી વધુ યુવાનો ધરાવતો દેશ મનાય છે. અનેક સરવે અને રિપોર્ટ્સ એવું કહી રહ્યા છે કે યુવાનોની ખાણીપીણીની આદતમાં ધરમૂળથી બદલાવ થઈ રહ્યો છે.

ફ્રેન્ચાઇઝ ઇન્ડિયાએ લોકોની બહાર ખાવાની આદતો પર એક સરવે કર્યો છે. તે અનુસાર તે અઠવાડિયામાં ૩૪ ટકા લોકો બેથી ત્રણ વખત બહાર રેસ્ટોરન્ટમાં કે ઢાબા પર ખાય છે. ૧૧ ટકા લોકો અઠવાડિયામાં ત્રણથી વધુ વખત બહાર ખાય છે. ૨૭ ટકા લોકો અઠવાડિયામાં એક વખત બહાર ખાય છે. ૧૨ ટકા લોકો એવા છે કે મહિનામાં એકાદ વખત જ બહાર ખાય છે. ૩ ટકા લોકો એવા છે કે કોઈ ચોક્કસ સારો પ્રસંગ હોય તો જ બહાર જમે છે. ચોંકાવનારો આંકડો તો એ છે કે ૧૨ ટકા લોકોને દરરોજ હોટલમાં ખાવાની આદત છે. એક અન્ય સરવે અંતર્ગત ઘણીબધી યુનિવર્સિટીઓના વિદ્યાર્થીઓને પૂછતાં જણાયું કે ૫૪ ટકા વિદ્યાર્થીઓ કોઈ ને કોઈ કારણસર સવારનો નાસ્તો કરતાં જ નથી. શાળામાં ભણતા નાની ઉંમરનાં બાળકો પણ ભણતરના ભારને કારણે નાસ્તો કર્યા વગર જ શાળાએ જતાં રહે છે.