પ્રથમ વખત મતાધિકારનો ઉપયોગ કરવા યુવાનો ઉત્સાહિત

લોકશાહીનો મહોત્સવ ગણાતી ચૂંટણીને આડે હવે ગણતરીના દિવસો બાકી છે, ત્યારે યુવાનો પણ મતદાન માટે ઉત્સાહિત છે. તેમાં પણ પ્રથમ વખત પોતાના અધિકારનો ઉપયોગ કરવા જઈ રહેલા યુવાનો માટે મતદાનનો અનુભવ એક રોમાંચ બની રહેશે. પહેલી વખત મતદાન કરતા યુવાનો કેવા બદલાવની અપેક્ષા રાખે છે? કયા પ્રશ્નોનું નિરાકરણ ઝંખે છે? જેવા અનેક સવાલો સાથે ‘અભિયાને’ યુવાનો સાથે વાત કરી.

- હેતલ રાવ, આર્જવ પારેખ

ચૂંટણી પંચ દ્વારા રજૂ કરવામાં આવેલી મતદારયાદી પ્રમાણે કુલ ૪,૯૦,૮૯,૭૬૫ મતદારો છે. કુલ મતદારોમાં ૨,૫૩,૩૬,૬૧૦ પુરુષ મતદારો છે, જ્યારે ૨,૩૭,૫૧,૭૩૮ મહિલા મતદારો છે. ૧૪૧૭ ટ્રાન્સજેન્ડર મતદારોનો પણ સમાવેશ થાય છે. જે આગામી વિધાનસભામાં પોતાના મતાધિકારનો ઉપયોગ કરશે. જ્યારે આ વખતે નવા ૧૧,૬૨,૫૨૮ જેટલા નવા મતદારો નોંધાયા છે. જેમાં ૧૮થી ૧૯ વર્ષના ૪. ૬૧ લાખથી વધુ યુવા મતદારોએ નોંધણી કરાવી છે.

ગુજરાતમાં ચૂંટણી ઝુંબેશ શરૂ થઈ ગઈ છે. દરેક વ્યક્તિમાં મતદાનને લઈને ઉત્સુકતા જોવા મળી રહી છે. તો તમામ પક્ષ પોતાને વિજયી બનાવવા માટે તૈયારીમાં લાગી ગયા છે. તમામ પક્ષની નજર યુવા મતદારો પર છે. એક સમય એવો હતો જ્યારે યુવાનો મતદાનને લઈને જાગૃત ન હતા, પરંતુ હવે યુવાનોમાં પોતાના હકને લઈને નવી જ જાગૃતિ આવી હોય તેમ સોશિયલ મીડિયાથી લઈને પોતે કોને મત આપશે ત્યાં સુધી બધું જ ગંભીર થઈને વિચારી રહ્યા છે. આ જ કારણ છે કે, હવે દરેક પક્ષ યુવાનો શું ઇચ્છે છે કે, યુવાનો કેવા વિચારો સાથે સહમત થશે વગેરે જાણવાનો પ્રયત્ન કરી રહ્યાં છે. જોકે આપણે ચર્ચા એ વાતની કરવાની છે કે આજના યુવાનો ચૂંટણીને લઈને શું વિચારી રહ્યા છે..? ચૂંટણીમાં તેમને કેટલો વિશ્વાસ છે? પ્રથમ વખત મતદાન કરતાં પહેલાં તેમનું મનોમંથન કેવું છે..? પોતાના મતાધિકારનો ઉપયોગ કરીને કેવા રાજ્યનું નિર્માણ કરવા ઇચ્છે છે..? કયા સવાલોનું તે સમાધાન માગે છે..? વગેરે..વગેરે..