પ. બંગાળના નવા રાજ્યપાલ સી.વી. આનંદ બોઝ નવો માહોલ સર્જશે?

સી.વી. આનંદને કુનેહથી વહીવટી સમસ્યાઓને ઉકેલવાનો લાંબો અનુભવ છે. તેમનું કાર્યક્ષેત્ર કેરળથી આરંભ થયું, જ્યાં સરકારી ગૂંચો સૌથી વધારે છે. પક્ષ અને વિપક્ષની લાંબી તકરાર દાયકાઓથી ચાલતી આવી છે!

- મુકેશ ઠક્કર

અનેક દિવસો સુધી રાહ જોવડાવી પશ્ચિમ બંગાળમાં નવા રાજ્યપાલ તરીકે સી.વી. આનંદ બોઝની નિમણૂક થઈ. બોઝ અટકને લીધે આરંભે તેમને બંગાળી માની લેવામાં આવ્યા, પણ હકીકતમાં સી.વી. આનંદ મૂળ કેરળના છે. આનંદના પિતા પી.કે. વાસુદેવન પિલ્લઈ સ્વતંત્રતા સેનાની હતા. માતાનું નામ સી. પદ્માવતી અમ્મા છે. વાસ્તવમાં આનંદના નામમાં બોઝ શબ્દ પાછળ છે, કારણ કે દક્ષિણ ભારતમાં એક તબક્કે નેતાજી સુભાષચંદ્ર બોઝની અટક પરથી ‘બોઝ’ અટક રાખવાનો રિવાજ હતો.

આનંદ શાળામાં અભ્યાસ પછી KE કૉલેજમાંથી આર્ટ્સમાં સ્નાતક, કેરળ યુનિવર્સિટીમાંથી અંગ્રેજી ભાષામાં પોસ્ટ ગ્રેજ્યુએશન કર્યું અને પછી બિરલા ઇન્સ્ટિટ્યૂટના સંશોધન પર પીએચ.ડી. થયા. આનંદ એક સારા વક્તા છે. મસૂરીમાં આઈએએસ ઓફિસર ટ્રેનિંગ એકેડમીમાં ડિબેટમાં પણ પ્રથમ સ્થાન મેળવતાં. તેઓએ ૧૦૦ મૅડલ જીત્યા છે!