૭૫૨ દિવસની લાંબી વાટ

બી-૧/બી-૨ વિઝા સામાન્ય રીતે દસ વર્ષના મલ્ટિએન્ટ્રી આપવામાં આવ્યા હોય છે. છેલ્લાં બે-ત્રણ વર્ષમાં આ દસ વર્ષના મલ્ટિએન્ટ્રી વિઝાની અનેકોની મુદતો પૂરી થઈ ગઈ હોય છે. તેઓ પણ ફરી પાછા દસ વર્ષના મલ્ટિએન્ટ્રી વિઝા મેળવવા માટે ઇચ્છુક હોય છે અને અરજી કરતાં હોય છે

- ડો.સુધીર શાહ

અમેરિકામાં ભણતાં સંતાનોની ગ્રેજ્યુએશનની સેરિમનીમાં હાજરી આપવા, ત્યાં વસતાં ભાઈ-બહેન, માતા-પિતા તેમ જ અંગત સગાંસંબંધીઓને મળવા, એમના ખબરઅંતર પૂછવા, ત્યાં ભરાતાં પ્રદર્શનોમાં ભાગ લેવા, ફરવા, વ્યાપારીઓ જોડે વ્યાપારને લગતી વાતચીત કરવા કે આવાં જુદાં-જુદાં કારણોસર અમેરિકાના બિઝનેસ વિઝા, જેની સંજ્ઞા ‘બી-૧’ છે યા વિઝિટર્સ વિઝા, જેની સંજ્ઞા ‘બી-૨’ છે એ મેળવવા માટે આજે જેઓ મુંબઈમાં આવેલ અમેરિકન કોન્સ્યુલેટની હદમાં રહેતાં હોય છે એ સર્વેને વિઝાના ઇન્ટરવ્યૂ માટે ૭૫૨ દિવસની વાટ જોવાની રહે છે! ન્યૂ દિલ્હીના વતનીઓએ તો આથી વધુ ૭૫૮ દિવસની વાટ જોવી પડે એવી પરિસ્થિતિનું નિર્માણ થયું છે! હૈદરાબાદની કોન્સ્યુલેટમાં ૭૩૮ દિવસ, કોલકાતાની કોન્સ્યુલેટ માટે ૭૩૬ દિવસ અને ચેન્નઈની કોન્સ્યુલેટમાં ૬૧૭ દિવસની વાટ જોવી પડે એવી પરિસ્થિતિનું નિર્માણ થયું છે!