ભારતીય સિનેમાનો વારસો સાચવવાની ખેવના

ફિલ્મ હેરિટેજ ફાઉન્ડેશનની સ્થાપના ૨૦૧૪માં ફિલ્મસર્જક શિવેન્દ્રસિંહ ડુંગરપુરે કરી હતી

- ઇમરાન દલ

ટેક્નોલોજીમાં આવતાં પરિવર્તનને કારણે જૂની ટેક્નોલોજી વડે બનેલી ફિલ્મોને સાચવવાનું કાર્ય પડકારરૂપ બની રહે છે. શિલ્પ, સ્થાપત્ય અને ચિત્રોની માફ્ક સિનેમા પણ કળા છે. જૂની ફિલ્મો આપણો વારસો છે. એને પણ જાળવવો પડે. એના થકી આવનારી પેઢીને તેના ભૂતકાળનું મૂલ્ય સમજાઈ શકે. ભારતીય સિનેમાના આ મૂલ્યવાન વારસાના રક્ષણ માટે ફિલ્મ હેરિટેજ ફાઉન્ડેશન સક્રિય છે. એ દિશામાં રાષ્ટ્રીય અને આંતરરાષ્ટ્રીય સ્તરે જાગૃતિ લાવવા માટે તે દર વર્ષે એક કાર્યશાળાનું આયોજન કરે છે.

ફિલ્મ હેરિટેજ ફાઉન્ડેશનની સ્થાપના ૨૦૧૪માં ફિલ્મસર્જક શિવેન્દ્રસિંહ ડુંગરપુરે કરી હતી. આ સંસ્થા ચલચિત્રોનાં સંરક્ષણ, જાળવણી અને પુનઃસ્થાપનને પ્રોત્સાહન આપવા અને સિનેમાની ભાષા વિશે જાગૃતિ લાવવા માટે સમર્પિત છે. કોરોના મહામારીને કારણે ત્રણ વર્ષના વિરામ પછી ફાઉન્ડેશન આયોજિત સાતમી કાર્યશાળા મુંબઈમાં શરૂ થઈ ચૂકી છે. ૪થી ૧૦ ડિસેમ્બર દરમિયાન છત્રપતિ શિવાજી મહારાજ વાસ્તુ સંગ્રહાલય ખાતે આ વર્કશોપ વર્લ્ડ સિનેમા પ્રોજેક્ટના સહયોગથી અમેરિકાના ફિલ્મ દિગ્દર્શક માર્ટિન સ્કોર્સીસના ‘ધ ફિલ્મ ફાઉન્ડેશન' અને ઇન્ટરનેશનલ ફેડરેશન ઓફ ફિલ્મ આર્કાઇવ્ઝ સાથે ભાગીદારીમાં આયોજિત કરવામાં આવી છે.