પ્રસૂન જોશી, સેન્સર બોર્ડ અને કવિન્યાય

ફિલ્મ ક્ષેત્ર સાથે સંકળાયેલી કોઈ વ્યક્તિ આ રીતે સ્વેચ્છાએ નૈતિક બંધનો સ્વીકારે એ વાત જ થોડી વિચિત્ર લાગે એવી છે, પણ પ્રસૂન જોશી આવા વ્યક્તિ છે. આપણે તેમની આવી ઓળખને સમજવી જોઈએ, પણ આપણે કહેવું જોઈએ કે સેન્સર બોર્ડના ચેરમેન તરીકે તેમની પોતાની કામગીરી પ્રત્યેનો આ એક પ્રકારનો કવિન્યાય છે

- તરુણ દત્તાણી

પ્રસૂન જોશી.

નામ તો સાંભળેલું લાગતું હશે.

હમણાં ગુમનામીમાં જણાતા આપણા ફિલ્મી ગીતકાર, પટકથા લેખક એ જ પ્રસૂન જોશી. જેમના પ્રોફાઇલમાં તો તેમને કોમ્યુનિકેશન સ્પેશિયાલિસ્ટ પણ ગણાવાયા છે અને વિજ્ઞાપનની જિંગલ્સ બનાવી હોવાથી માર્કેટિંગ સાથે સંકળાયેલા પણ ગણી શકાય. ફિલ્મ અને વિજ્ઞાપન ક્ષેત્રની ટોચની કંપનીઓના બોર્ડમાં તેઓ રહી ચૂક્યા છે, પણ આપણે માટે તો તેઓ હિન્દી ફિલ્મ જગતના આશાસ્પદ અને સંવેદનશીલ ગીતકારોમાંના એક છે, પણ આ બધું જાણે નજીકના ભૂતકાળની બાબત હોય એવું બની ગયું છે. હવે તેઓ હિન્દી ફિલ્મો માટે ભાગ્યે જ ગીત લખે છે. ઘણા સમયથી જાહેરમાં તેમનું નામ પણ ક્યાંય જોવા-સાંભળવા મળ્યું નહોતું. કોરોના સંકટનો દોઢ-બે વર્ષનો સમય ફિલ્મોધોગ માટે તમામ પ્રવૃત્તિઓ સ્થગિત કરી દેનારો બની રહ્યો હતો એ વાત સાચી પણ પ્રસૂન જોશીની ગુમનામીનું કારણ એ નથી. છેલ્લાં પાંચ વર્ષથી તેઓ ભારતીય ફિલ્મ સેન્સર બોર્ડના ચેરમેન છે અને આ હોદ્દા પર રહેવાને કારણે તેમણે સ્વેચ્છાએ જે મર્યાદાઓ સ્વીકારી છે, તેને કારણે તેઓ ક્યાંય ચર્ચામાં દેખાતા નથી. જે ફિલ્મી કંપનીઓના બોર્ડ ઉપર તેઓ હતા તેમાંથી તેમણે રાજીનામું આપી દીધું. એટલું જ નહીં તો સ્વેચ્છાએ ફિલ્મોમાં ગીત લખવાનું પણ તદ્દન ઓછું કરી નાખ્યું અને આ બધું તેમણે એટલા માટે કર્યું કે જેથી સેન્સર બોર્ડ સમક્ષ આવતી ફિલ્મોને તેઓ નિષ્પક્ષ રીતે ન્યાય આપી શકે.