હિમાચલમાં કોંગ્રેસનો વિજય, આશાનું કિરણ

ભાજપને હિમાચલમાં તેના બળવાખોર ઉમેદવારો નડી ગયા છે. ભાજપે નવા ચહેરાઓને તક આપવા માટે અનેક ચાલુ ધારાસભ્યોને ટિકિટ આપી ન હતી. એવા ૨૨ લોકો અપક્ષ ઉમેદવાર તરીકે ઊભા રહ્યા હતા. આ વિદ્રોહી ઉમેદવારોએ ભાજપના પરાજયમાં મોટો ભાગ ભજવ્યો છે

- ચાણક્ય

હિમાચલ પ્રદેશ વિધાનસભાની ચૂંટણીમાં કોંગ્રેસનો વિજય બહુ મહત્ત્વપૂર્ણ છે. કોંગ્રેસના કોઈ મોટા નેતા હિમાચલ પ્રદેશમાં ચૂંટણી પ્રચાર માટે ગયા ન હતા. પ્રિયંકા ગાંધીએ કેટલીક રેલીઓ યોજી હતી, પરંતુ એકંદરે હિમાચલ પ્રદેશમાં કોંગ્રેસ પોતાની તાકાત ઉપર ચૂંટણી લડીને વિજય મેળવવામાં સફળ બની છે. હિમાચલ પ્રદેશમાં આ રીતે લાંબા સમયથી દરેક ચૂંટણીમાં સત્તા પરિવર્તનની પ્રણાલી ચાલી આવે છે, તેને રાજ્યના લોકોએ જાળવી રાખી છે. છેલ્લા ઘણા સમયથી દેશભરમાં વિવિધ રાજ્યોમાં થતી ચૂંટણીઓ અને પેટા ચૂંટણીમાં સતત પરાજયનો સામનો કરી રહેલી કોંગ્રેસ માટે હિમાચલનો વિજય ખૂબ જ આશ્વાસન આપનારો છે.

આ નાનકડા પહાડી રાજ્યમાં ભાજપે ફરી સત્તા મેળવવા માટે ભારે જોર લગાવ્યું હતું. કેન્દ્રીય પ્રધાન અનુરાગ ઠાકુર અને ભાજપના રાષ્ટ્રીય પ્રમુખ જે.પી. નડ્ડાનું આ વતન રાજ્ય છે અને આ બંને નેતાઓએ ત્યાં ચૂંટણી પ્રચાર કર્યો હોવા છતાં તેઓ ભાજપને વિજયી બનાવી શક્યા નથી.