પ્રમુખસ્વામી મહારાજનગરને શોભાવતાં આકર્ષણો

પ્રમુખસ્વામી મહારાજની જન્મશતાબ્દીના મહોત્સવ નિમિત્તે અમદાવાદના પશ્ચિમ છેડે સરદાર પટેલ રિંગ રોડ પાસે વિશાળ ભૂમિ પર નિર્માણ પામેલું પ્રમુખસ્વામી મહારાજનગર એકાધિક આકર્ષણોને લીધે ‘કલ્ચરલ વન્ડરલૅન્ડ’ બની ગયું છે. અહીં આબાલવૃદ્ધ સૌનાં મન મોહી લે એવા વૈવિધ્યનું સર્જન કરવામાં આવ્યું છે. છેલ્લા ૩૬૫ દિવસથી દેશવિદેશના શ્રદ્ધાળુ સેવકોની રાતદિવસની મહેનતને પરિણામે સર્જાયેલાં ૧૪ જેટલાં આકર્ષણોથી પ્રમુખસ્વામી નગર દીપી ઊઠ્યું છે. ૧૫ ડિસેમ્બરથી લોકો રોજ બપોરે ૨ વાગ્યાથી રાત્રિના ૧૦ વાગ્યા સુધી આ પ્રમુખ સ્વામીનગરમાં વિચરણ કરી શકશે.

- ઇમરાન દલ

બેનમૂન સ્થાપત્ય સમા પ્રવેશદ્વારો

કોઈ શહેરમાં પ્રવેશવા માટેના દ્વાર બનાવવા એ આપણી ઐતિહાસિક પરંપરા રહી છે. એવી રીતે પ્રમુખસ્વામી મહારાજ નગરમાં પ્રવેશવા માટે કુલ સાત પ્રવેશદ્વાર બનાવવામાં આવ્યા છે. જેમાં મુખ્ય પ્રવેશદ્વાર સરદાર પટેલ રિંગ રોડ પર આવેલું છે, જે ૨૮૦ ફૂટ પહોળું અને ૫૧ ફૂટ ઊંચું છે. આ પ્રવેશદ્વાર ભારતીય સંસ્કૃતિના મહાન જ્યોતિર્ધર સંતોનું સ્મરણ કરાવે છે. મહોત્સવ સ્થળની બંને તરફ વિશાળ પાર્કિંગ એરિયા છે. જેમાંથી નગરમાં પ્રવેશ કરાવતાં અન્ય છ પ્રવેશદ્વાર પણ કળા-કારીગરીના શ્રેષ્ઠ નમૂનારૂપ છે. ૧૧૬ ફૂટ લાંબા અને ૩૮ ફૂટ ઊંચા આ દરેક પ્રવેશદ્વાર પ્રમુખસ્વામી મહારાજની જીવનગાથાને દર્શાવે છે. મુખ્યપ્રવેશ દ્વાર પાસે વીવીઆઈપી પાર્કિંગ છે, જ્યારે બાકીના દરેક પ્રવેશદ્વાર બહાર સામાન્ય મુલાકાતીઓ માટે પાર્કિંગની વ્યવસ્થા કરવામાં આવી છે. સૌરાષ્ટ્ર, ઉત્તર ગુજરાત તરફથી આવતા પ્રવાસીઓને નગરમાં પ્રવેશવાનું સરળ બને એ માટે પ્રવેશદ્વારને એ પ્રકારે સ્થાન અપાયેલાં છે.

પ્રમુખસ્વામી મહારાજની ભવ્ય પ્રતિમા

જેમના પાવન સ્મરણમાં આ નગરની રચના કરવામાં આવી છે એ પ્રમુખસ્વામી મહારાજની પ્રતિમાથી નગરને ચાર ચાંદ લાગ્યા છે. મુખ્ય પ્રવેશદ્વારમાં દાખલ થતાં જ સામે ઝીણવટભર્યા કોતરકામની ભાતથી શોભતી દીવાલ ધરાવતું વિશાળ વર્તુળ જોવા મળે છે. એ વર્તુળ વચ્ચે ૧૫ ફૂટ ઊંચી પીઠિકા પર પ્રમુખસ્વામી મહારાજની ૩૦ ફૂટ ઊંચી સ્વર્ણિમ પ્રતિમા તરત ધ્યાન ખેંચે છે. છેક દૂરથી જ પ્રમુખસ્વામી મહારાજનાં દર્શન કરીને ભાવક ધન્ય બને છે.

વર્તુળની અંદરની દીવાલ પર નયનરમ્ય ચિત્રોની સજાવટ સાથે પ્રમુખસ્વામી મહારાજની વહેલી સવારથી માંડી રાત્રિના સૂવા સુધીની દિનચર્યાનો વિસ્તૃત આલેખ આપવામાં આવ્યો છે.

દિલ્હીના અક્ષરધામ મહામંદિરની પ્રતિકૃતિ