સ્પિરિચ્યુઅલ કેન્સરની ત્રણ ગાંઠ

ઉત્તરાયણ આધ્યાત્મિક રીતે ખૂબ મહત્ત્વનો સમય છે. ગાંઠ છૂટે એ માટે પ્રાર્થના 'ને પ્રયત્ન કરવા જોઈએ. સેન્સનું સેન્સર બોર્ડ એવું બનવું જોઈએ કે ત્રિગ્રંથિ માન્ય ના કરે

સાધનાના નિબંધમાં કોઈ જ પ્રબંધ કે બંધ ના ચાલે 

સત્સંગ યોગ્ય થવો જોઈએ જેથી હુંનો સંગ ના ચાલે

હું છું, એ પાયો છે. હું કરતો હતો, હું કરું છું 'ને હું કરીશ. એ મકાન. મારું હતું, મારું છે 'ને મારું થશે. બીજા છે, બીજાનું છે ’ને આ મને નથી ગમતો, પેલું મને નથી ગમતું ’ને પેલો તો ના જ ચાલે, આ તો હોવું જ ના જોઈએ. આ મકાનનું આંગણું. મારામાં આ સારું ’ને સાચું વત્તા આ ખરાબ ’ને ખોટું. આ છત્ર. આ ત્રણ કહી શકાય એ મુખ્ય પાસા જીવનમાં હોય છે. જ્યોતિષ તેમ જ આધ્યાત્મિક દૃષ્ટિકોણથી વિચારીએ તો પૂર્વ જન્મની અસર મુજબ આ જન્મ થાય છે ’ને એ મુજબ મહદ્અંશે કુંડળી કે પ્રારબ્ધ ઘડાયેલું હોય છે. એ સિવાયના તાર્કિક કે વ્યવહારુ નજરિયાથી વિચારીએ તો મનુષ્ય જન્મથી અમુક વત્તા તમુક ગાંઠ ધરાવે છે ’ને બાકીની ગાંઠો તેના વ્યક્તિત્વમાં ઉમેરાતી જાય છે. પાસ્ટ સિવાય એક બાજુ જનીન ’ને બીજી બાજુ જે માહોલમાં સ્વનું સંસ્કરણ થયું હોય છે તે. શક્ય છે અમુક ગાંઠો છૂટતી જાય. સંભવ છે કે અમુક ગાંઠ ના જ ઉમેરાય. છતાં સરવાળે અમુક નક્કર તેમ જ નિરાકાર પાસા જીવનની બેકબોન બની જાય છે. કરોડસ્તંભ મણકાથી બન્યો હોય છે તો જીવનસ્તંભ ગાંઠથી બનેલો રહે છે

જીવન વિવિધ પ્રકારના ત્રણ પરિમાણમાં આપણે જોઈએ છે. આદિ, મધ્ય ’ને અંત. બીજી રીતે જનરેશન, ઑપરેશન ’ને ડિસ્ટ્રક્શન. જી, ગોડ. એક છે શરૂઆત કે એક છેડો એવમ સર્જન જેની સાથે સંબંધ છે ‘હું કરું’ એ ભાવને. બીજું મધ્યમાં છે જે ઓલરેડી કર્મ થઈ ગયું હોય કે સર્જન થઈ ગયું હોય તેને ટકાવી રાખવું, પોષણ આપવું, વ્યવસ્થાપન કરવું તેમ જ તેનું રક્ષણ કરવું. અંત અથવા એક છેડે છે ત્રીજું પાસું. વિસર્જન કે વિનાશ. વિરોધ. વિપરીતપણું. આપણે જાણીએ છીએ એ મુજબ આ ત્રણ પાસાં કે બાજુ એટલે બ્રહ્મા, વિષ્ણુ ’ને મહેશ. આ ત્રિપાર્થ કાચ જેને આપણે જોઈ શકતા નથી, પણ જેમાંથી આપણે જોઈએ છે અથવા જેમાંથી આપણને દેખાય છે. આપણને આ કાચ ક્રિસ્ટલ જેવો તાકાતવર જણાય છે. છે ફાલતુ પ્રિઝમ, પણ ડાયમન્ડ જેવો લાગે છે. કેમ કે તેમાંથી થઈ જે કશું અસ્તિત્વમાંથી આવે છે તે માનસ પટલ પર મેઘધનુષ્ય રચે છે. મેઘધનુષ્ય એટલે ઇન્દ્રચાપ. ઇન્દ્ર એટલે સર્વે ઇન્દ્રિયનો સર્વસામાન્ય કે પ્રભાવી પાવર.