ચીન-જાપાનમાં વસતિના અસંતુલનનું સંકટ

ચીન હવે દંપતીઓને એક બાળક પેદા કરતા ૭૫૦૦ યુઆન, બીજું બાળક પેદા કરનારને ૧૧,૦૦૦ યુઆન તેમ જ ત્રીજું બાળક પેદા કરનારને ૬૦૦ યુઆન આપવાની પ્રોત્સાહક નીતિનો અમલ કરવા જઈ રહ્યું છે

વસતિ વધારાની સમસ્યાએ વિશ્વના દરેક દેશોમાં અવનવી સમસ્યાઓ સર્જી છે. વસતિનો વધારો અટકાવવા માટે કડક પગલાં અને નિયંત્રણો મૂકનારા દેશોને પણ લાંબા ગાળે તેમની આવી નીતિને કારણે સર્જાયેલી વિચિત્ર સમસ્યાનો સામનો કરવાનો આવે છે. આવી સમસ્યાનો સાર એ છે કે, વસતિ વધારા બાબતે કોઈ પણ નિયમ - કાયદા કે નિયંત્રણોમાં સતત સુધારા-વધારા અને તેની સમીક્ષા થતી રહેવી જોઈએ. અન્યથા લાંબા ગાળે તેના વિપરીત પરિણામો પણ આવી શકે છે.

અત્યારે ચીન અને જાપાનમાં જે કાંઈ થઈ રહ્યું છે અને જે પરિસ્થિતિ નિર્માણ થઈ છે, તે પણ આવા પ્રકારની જ છે. આ બંને દેશોના અત્યારે વૃદ્ધોની એટલે કે સિનિયર સિટીઝનની વધતી જતી સંખ્યાએ નવા પ્રકારનું સંકટ નિર્માણ કર્યું છે. સમયની સાથે વૃદ્ધ નાગરિકોની વધતી જતી વસતિના બોજથી આ બંને દેશો હવે કાર્યશીલ અને શ્રમ કરવાની શક્તિ ધરાવતા લોકોને પ્રોત્સાહન આપવા તત્પર થયા છે. ચીનમાં વસતિ વધારાને નિયંત્રિત કરવા માટે દાયકાઓ પહેલાં એક બાળકની નીતિ અપનાવવામાં આવી હતી અને ચીનમાં સામ્યવાદી સરમુખત્યારી હોવાને કારણે આ નિયમનો સખ્તાઈથી અમલ કરવામાં આવતો હતો. તેને કારણે ચીનમાં વસતિ વધારાને અસરકારક રીતે અટકાવવામાં સફળતા મળી છે, પરંતુ એ સફળતા પછી હવે નવા તબક્કામાં તેનાં દુષ્પરિણામો પણ દેખાવા લાગ્યા છે.