હિન્ડનબર્ગ અહેવાલ અને અદાણી: ભારત સામે આર્થિક યુદ્ધ?

ભારતમાં પણ હિન્ડનબર્ગને સાણસામાં લેવા માટે કાનૂની માળખું નથી. જો હિન્ડનબર્ગ પર નુકસાની માટે દાવો માંડીએ તો ગૌતમ અદાણીના પૌત્રો પણ તે કેસ લડતા જોવા મળી શકે છે

વડાપ્રધાને એક જાહેરાત કરી હતી કે ભારતને ૨૦૪૭ સુધીમાં વિકસિત રાષ્ટ્ર બનાવીને આવનારી પેઢીના હાથમાં દેશને સોંપવાની ઇચ્છા તેઓ ધરાવે છે અને તે રીતે જ દેશની તમામ નીતિઓનું ઘડતર અને નિર્ધારણ કરવામાં આવી રહ્યું છે. આ જાહેરાત થતાંની સાથે જ ભારત વિરોધી અને મોદી વિરોધી રાષ્ટ્રીય અને આંતરરાષ્ટ્રીય લોબી સક્રિય થઈ ગઈ છે. છેલ્લાં બે વર્ષમાં ‘આત્મનિર્ભર ભારત’ને જે સફળતા મળી રહી છે તેનાથી સમગ્ર વિશ્વની ભારત વિરોધી અને મોદી વિરોધી લોબી બેચેની અનુભવી રહી છે. ‘આત્મનિર્ભર ભારત‘ ‘સ્ટાર્ટ-અપ ઇન્ડિયા’ અને ‘મેક ઇન ઇન્ડિયા’ની સફળતાથી વિશ્વના કોર્પોરેટ ક્ષેત્રના ધુરંધરોના પેટમાં ફાળ પડી છે, કારણ કે તેઓ માટે આજ સુધી ભારત એક વિશાળ બજાર રહ્યું છે. આટલું મોટું બજાર હાથમાંથી સરકી જતું દેખાઈ રહ્યું હોય ત્યારે તેઓ મરણિયા ન બને તો જ નવાઈ. આથી જ આ જ તાકાતોએ આપણા દેશ સામે આર્થિક યુદ્ધની શરૂઆત કરી દીધી હોય તેવું ક્ષિતિજે દ્રષ્ટિગોચર થઈ રહ્યું છે.

વિશ્વમાં પાંચ બિઝનેસ એવા છે કે જેની ઉપર વિશ્વના મલાઈ ખાઈ ખાઈને તગડા થયેલા વિદેશી કોર્પોરેટ હાઉસિસનો દબદબો દાયકાઓથી રહ્યો છે. આ પાંચ બિઝનેસ છે (૦૧.) સંરક્ષણ (૦૨.) ફાર્મા (૦૩.) એનર્જી (૦૪.) ઇન્ફ્રાસ્ટ્રક્ચર અને (૦૫.) ટૅક્નોલૉજી. આ પાંચ બિઝનેસમાં ભારતના કોર્પોરેટ હાઉસિસની વિશ્વમાં બહુ પકડ આજ સુધી હતી નહીં. વિશ્વના કોર્પોરેટ હાઉસિસ માટે ૧૪૦ કરોડની વસતિ ધરાવતું ભારત બહુ મોટું બજાર રહ્યું છે. હવે આ પાંચ મુખ્ય બિઝનેસમાં ભારતના કોર્પોરેટ હાઉસિસ વિશ્વ કક્ષાએ હરીફાઈમાં ઊતરે તો જેઓનો દાયકાઓથી વિશ્વમાં દબદબો રહ્યો છે તેઓને માફક આવે જ નહીં.