ફોર્થ ઓફ જુલાઈ

અમેરિકાએ ‘ધ ઇમિગ્રેશન એન્ડ નેશનાલિટી ઍક્ટ, ૧૯૫૨’ ઘડ્યો છે. જેની હેઠળ અમેરિકામાં કોઈ પ્રવેશી શકે, કોણ કેવી રીતે કાયમ રહી શકે એના લગતા કાયદાઓ ઘડવામાં આવ્યા છે

- ડો.સુધીર શાહ

સ્પેનના ક્રિસ્ટોફર કોલંબસે, જે ભારત આવવાનો ટૂંકો રસ્તો ખોજવા નીકળ્યો હતો, એણે ભૂલથી એક નવા જ દેશની ઈ.સ. ૧૪૯૨માં ખોજ કરી. પાછળથી એને ‘અમેરિકા’ એવું નામ આપવામાં આવ્યું. ઇંગ્લેન્ડ અને યુરોપના લોકોને જેવી ખબર પડી કે એક નવો દેશ શોધાયો છે, એ ખૂબ મોટો છે, ત્યાં વસતા લોકો જેને કોલંબસે રેડ ઇન્ડિયન એવું નામ આપ્યું છે એ લોકો એમના દેશમાં પ્રવેશતા લોકોનો વિરોધ કરવા શક્તિમાન નથી, એ દેશમાં ખેતીવાડી માટે ઉત્તમ જમીનો છે અને ખનિજ સંપત્તિથી એ દેશ ભરેલો છે, આથી ઇંગ્લેન્ડ અને યુરોપના લોકોએ અમેરિકા ભણી દોટ મૂકી. જોત જોતામાં એમણે પોતાપોતાની કોલોનીઓ એ દેશમાં સ્થાપી.

‘કોલોની’ એટલે ઇમિગ્રન્ટોનું એક જૂથ. જે દૂરના દેશમાં જઈને સ્થાયી થયું હોય, પણ જેઓ પોતાના દેશ જોડે ખૂબ જ નજીકથી સંકળાયેલા હોય. આવાં જૂથોને કોલોની કહેવામાં આવે છે.

યુરોપના ફ્રાન્સ, જર્મની, સ્પેન, પોર્ટુગલ આમ જુદા-જુદા દેશોના લોકો અમેરિકામાં જઈને વસ્યા અને એમણે પોતપોતાની કોલોનીઓ સ્થાપી. ઇંગ્લેન્ડના લોકોએ પણ અમેરિકામાં પોતાની કોલોનીઓ સ્થાપી. આમાં ઇંગ્લેન્ડની કોલોનીઓ વધુ અસરકારક હતી. એમણે અન્ય દેશોની કોલોની ઉપર હક્ક જમાવવા માંડ્યો. આ કારણસર ઇંગ્લેન્ડની હકૂમત અમેરિકામાં સ્થપાયેલ કોલોનીઓ ઉપર ચાલવા માંડી. ઇંગ્લેન્ડ આ બધી કોલોનીઓ માટે કાયદાઓ ઘડે, કરવેરા વસૂલ કરે.