અમેરિકન સિટીઝન બનવું છે?

અમેરિકન સિટીઝન બનવાની અરજી કરવાની ઇચ્છા હોય તેઓ ગ્રીનકાર્ડ મળ્યા બાદ પાંચ વર્ષ પછી અને લગ્નસંબંધના આધારે મળ્યું હોય તો ત્રણ વર્ષ પછી કરી શકે છે

- ડો.સુધીર શાહ

ચેતન પટેલ છેલ્લાં વીસ વર્ષથી, જ્યારથી એ પંદર વર્ષનો હતો અને માતા-પિતા જોડે ડિપેન્ડન્ટ ઇમિગ્રન્ટ વિઝા ઉપર અમેરિકામાં આવ્યો હતો અને એક ગ્રીનકાર્ડધારક તરીકે રહેતો હતો એને હવે એવું લાગવા માંડ્યું કે મારે નૅચરલાઇઝેશનની પ્રક્રિયા દ્વારા અમેરિકન સિટીઝન બનવું જોઈએ. એનો સૌથી મોટો ફાયદો એ કે એ ધારે એટલો સમય અમેરિકા બહાર રહી શકે. બીજું, અમેરિકન પાસપોર્ટધારકોને કંઈકેટલાય દેશમાં વિઝા વગર પ્રવેશ આપવામાં આવે છે. એ એનો ફાયદો પણ ઉઠાવી શકે.

વર્ષ ૧૯૯૬માં અમેરિકામાં જે વેલ્ફેર રિફૉર્મનો કાયદો ઘડવામાં આવ્યો હતો એના દ્વારા ગ્રીનકાર્ડધારકોની ઘણા પ્રકારની પબ્લિક નિફિટની સવલતો છીનવાઈ ગઈ હતી. એ અમેરિકન સિટીઝન બને તો એને એ બધી જ સવલતો, જે ગ્રીનકાર્ડધારકો પાસેથી લઈલેવામાં આવી હતી, એ મળી શકે. એને અમેરિકાની ગવર્મેન્ટમાં સિટીઝનો માટે અનામત રખાયેલ નોકરી જોઈતી નહોતી, પણ જો જરૂર આવી પડે તો એ અમેરિકન સિટીઝન હોય તો એને સિટીઝનો માટે જે નોકરી અનામત રાખી છે એમાંની કોઈ મળી શકે. બીજું, એને આજે ગ્રીનકાર્ડધારક તરીકે અમેરિકાના ઇલેક્શનમાં ભાગ લેવાનો, વોટ આપવાનો અધિકાર નહોતો. ચેતન પટેલ પોલિટિક્સમાં ઊંડો રસ ધરાવતો હતો. એ ભલે મૂળ ભારતનો હોય, પણ વર્ષોથી અમેરિકામાં રહેતો હોવાના કારણે એ પોતાને અમેરિકન જ સમજતો હતો અને અમેરિકાના રાજકારણમાં ઊંડો રસ ધરાવતો હતો.