બોલિવૂડના સ્ટાર્સનું પ્રમોશન અને રમી જેવી રમતો દ્વારા યુવાધનનું પતન

પ્રસિદ્ધ મન્નત બંગલાની બહાર શનિવાર, ૨૬ ઑગસ્ટના રોજ પ્રદર્શનકારીઓ મોટી સંખ્યામાં પહોંચી ગયા હતા. તેઓએ શાહરુખને કહ્યું કે, ‘મહારાજા, હોશમાં આવો’. ઓનલાઇન જુગાર રમવા માટે યુવાનોને પાનો ચડાવતી, બહેકાવતી શાહરુખની જાહેરખબર પોતે જ એક વ્યંગ બની જાય છે

- વિનોદ પંડ્યા

વલસાડ જિલ્લાના વાપી શહેરનો એકવીસ વરસનો ખૂબ તેજસ્વી યુવાન પ્રભાત શર્મા એન્જિનિયરિંગના ડિગ્રી કોર્સનો અભ્યાસ કરવા ચાંદખેડાની વિશ્વકર્મા ગવર્નમેન્ટ કૉલેજમાં દાખલ થયો હતો. કૉલેજની હોસ્ટેલમાં રહેતો હતો અને મા-બાપ વાપીના દીપમાલા ઍપાર્ટમૅન્ટમાં રહેતાં હતાં.

એક રવિવારની સાંજે રૂમમાં અન્ય વિદ્યાર્થીઓ હાજર નહોતા, ત્યારે પંખા સાથે દોરડું બાંધીને પ્રભાતે ગળાફાંસો ખાઈ લીધો. આત્મહત્યા કરવાનું કારણ પ્રભાત સ્પષ્ટ રીતે લખતો ગયો હતો. ચાંદખેડા પોલીસે તપાસ આદરી તો જણાયું કે પ્રભાત એક અસાધારણ તેજસ્વી વિદ્યાર્થી હતો. એણે દસમા અને બારમા ધોરણમાં ડિસ્ટ્રિક્શનથી પણ ઘણા વધુ માર્ક્સ મેળવ્યા હતા. એટલું જ નહીં, એન્જિનિયરિંગના પ્રથમ સેમેસ્ટરમાં પણ ડિસ્ટિન્શનથી પણ ઘણા વધુ માર્ક્સ મેળવ્યા હતા. પ્રભાતે આત્મહત્યાનું સ્પષ્ટકારણસુસાઇડ નોટમાં લખ્યું હતું. તે મુજબ એકાદ વરસથી એ પ્રથમ તો ઓનલાઇન ગેમ્સ રમતો થયો હતો અને એ રમતો નિર્દોષ હોય ત્યાં સુધી તે રમવામાં કશું ખોટું નથી, પરંતુ ધીમે-ધીમે એ ઓનલાઇન ગેમ્સમાંથી નીકળીને ઓનલાઇન ગેમ્બલિંગમાં, અર્થાત્ નિર્દોષ વીડિયોગેમ્સને બદલે જુગાર રમાડતી ગેમ્સમાં ઘૂસી ગયો હતો.

ઓનલાઇન ગેમ્સ હોય કે ગેમ્બલિંગ હોય, વત્તા-ઓછા અંશે તેમાં સરખી સ્કિલ (આવડત) ની જરૂર પડતી હોય છે. નિર્દોષ ગેમ્સ રમવી હોય તો ગેમ્સ જેટલી અઘરી એટલી આવડતની જરૂરત વધારે. બીજી તરફ જુગાર માટેની ગેમ્સ એવી ચતુરાઈપૂર્વક ઘડવામાં આવી હોય છે, જેમાં ગમે એટલું દોડો કે ભાગો, આખરી વિજય તો એ જુગાર રમાડનારી કંપનીઓનો જ થવાનો હોય છે. વચ્ચેના અમુક દિવસ જુગારીને ફાયદો થાય. જો મન મજબૂત રાખીને તેમાંથી ત્યારે જ નીકળી જાવ તો ફાયદો રહે. અન્યથા ફાયદાથી વધુ રમવાની ચાનક ચડે અને આખરે આપણું પોતાનું જે હોય તે પણ જતું રહે. આથી જ ઓનલાઇન ગેમ્બલિંગ કંપનીઓ રમવાની ઇચ્છા કે અનિચ્છા જાણ્યા વગર તમામ ઇન્ટરનેટ કનેક્શન ધારકના ખાતામાં દોઢ હજારથી દસ હજાર રૂપિયા સુધીની રકમ કંપની તરફથી જમા કરાવે અને મેસેજ દ્વારા જુગાર રમવા આવવાનું કનેક્શનધારકને નિમંત્રણ મોકલે. જંગલી રમી કે એવાં નામો ધરાવતી કંપનીઓના મેસેજો ઘણા લોકોને મળતા હશે.