અમે અભણ, પરંતુ બાળકો અમારાં ખૂબ ભણશે

માતા-પિતા ભણેલાં હોય અને સંતાનોને સારું શિક્ષણ આપે તે સ્વાભાવિક છે, પરંતુ અભણ માતા-પિતા પોતાનાં સંતાનો ખૂબ ભણે તે માટે મહેનત કરીને તેમને પ્રોત્સાહિત કરતાં હોય તે વાત અન્યોને પણ પ્રેરણા આપે છે. આજના સમયમાં ભણતર રોજગાર મેળવવા માટે તો મહત્ત્વનું છે જ, પરંતુ સાચું ભણતર વ્યક્તિને જીવન કેવી રીતે જીવવું તે શીખવે છે. જો માતા-પિતા પોતાનાં સંતાનોના વિકાસ માટે સજાગ હોય તો પછી તેઓ પોતે કેટલું ભણ્યા તે મહત્ત્વનું રહેતું નથી. બાળકો પોતાનો જીવનરાહ સાચી રીતે કંડારે તે બાબત જ તેમના માટે મહત્ત્વની બની રહે છે.

- સુચિતા બોઘાણી કનર

સંતાનો સારું ભણે, પગભર થાય અને સારી રીતે જિંદગી જીવે તે જ કોઈ પણ માતા-પિતાની અંતરતમ ઇચ્છા હોય છે, પરંતુ અનેક ભણેલાં ગણેલાં વાલીઓ પણ પોતાની નોકરી, વ્યવસાય, અંગત જિંદગીમાં એટલા વ્યસ્ત હોય છે કે તેઓ સંતાનોની પ્રગતિ પ્રત્યે પૂરતી નજર રાખી શકતાં નથી. અનેક વખત કિશોરાવસ્થાનાં બાળકોને ટ્યુશન, ટીચરના ભરોસે રાખીને, પૂરતા કે જરૂરતથી વધુ પૈસા ખર્ચીને, મોબાઇલ - કોમ્પ્યુટર જેવી સગવડ તેમના હાથવગી કરીને તેમનું યોગ્ય લાલન પાલન કર્યાનો સંતોષ તેઓ માનતા હોય છે, પરંતુ જ્યારે એ જ સંતાનો મોટા થઈને જીવનના યુદ્ધમાં ઊતરે અને પાંગળા પુરવાર થાય ત્યારે માતા-પિતાને કંઈક ચૂકી ગયાનો અહેસાસ થાય છે. શહેરોમાં અનેક  શિક્ષિત, પૈસાપાત્ર કુટુંબોમાં આવી સ્થિતિ હોય છે. તેની સામે જ ગામડાં કે નાનાં શહેરોમાં રહેતાં, અભણ કે ઓછું ભણેલાં માતા-પિતાનાં સંતાનો વાલીઓની પ્રેરણાથી અને પોતાની મહેનતથી જે સિદ્ધિ હાંસલ કરે છે, તે ખરેખર નેત્રદીપક હોય છે. આવાં સંતાનો કુટુંબનું નામ રોશન તો કરે જ છે, સાથે-સાથે તેઓ પોતાનાં ભાઈ-બહેનોનાં જીવનમાં પણ અકલ્પનીય બદલાવ લાવે છે. આ માટે જરૂરી પ્રેરણા અને પ્રોત્સાહન તો માતા-પિતા જ પૂરું પાડે છે.

આવી જ વાત છે, ભુજની ઝેનબખાતુનની. સાત ભાઈ-બહેનોની મોટી બહેન તરીકેની જવાબદારી, માંદી બહેનની સારવાર, ઘરકામમાં માતાની મદદ કરીને ભણતી આ ૧૮ વર્ષની યુવતી માટે ભણવા માટે સમય કાઢવો પણ મુશ્કેલ, પરંતુ માતા-પિતાની પ્રેરણાથી તે મુશ્કેલીમાંથી પણ માર્ગ કાઢીને તે પોતાના લક્ષ્ય સુધી પહોંચવા મથી રહી છે અને તેમાં સફળ થવાનો પૂરો વિશ્વાસ તેને છે.