કવર સ્ટોરી

અંતરની અયોધ્યામાં રામરૂપી અજવાળું

-  સ્પર્શ હાર્દિક

પોષ સુદ બારસના એ દિવસની સવારમાં કંઈક અલૌકિક જ સ્પંદનો હતાં. હર્ષોલ્લાસથી ચાલી રહેલાં ભજનો અને રામનામ જાપની ઊર્જાથી આપણે સૌ પુલકિત થઈ રહ્યાં હતાં. એક લાંબી યાત્રાની, એક દીર્ઘ સંઘર્ષની, એક આકરા તપની જાણે પૂર્ણાહુતિ થવા જઈ રહી હતી.

રામભક્તો શબરીની જેમ એ ક્ષણોની પ્રતિક્ષામાં હતાં, જ્યારે કાળરેખા પર એક શુભ ઘડી અંકિત થવાની હતી. અંતે અભિજિત મુહૂર્તમાં એ માંગલ્યપૂર્ણ ક્ષણો પ્રગટી ઊઠી. પ્રાણપ્રતિષ્ઠાનું અનુષ્ઠાન શ્રીરામ જન્મભૂમિ અયોધ્યાના દિવ્ય મંદિરના ગર્ભગૃહમાં થઈ રહ્યું હતું અને દેશ-વિદેશમાં વસેલા સેંકડો ભક્તોના અંતરમાં પ્રજ્વલિત શ્રદ્ધારૂપી અર્થ એ અનુષ્ઠાનમાં અધિક ને અધિક બળ પૂરી રહ્યું હતું. લખ ચોર્યાસીના ફેરામાં ફર્યા કરતા સેંકડો જીવોએ તે ધન્ય ચોર્યાસી સેકન્ડ દરમિયાન રામલલ્લા પ્રતિ પોતાના હેત, વ્હાલ કે લાડના સ્વરૂપમાં આસ્થા વહાવીને ખરા અર્થમાં એમાં પ્રાણ પૂરવાના યજ્ઞનો આરંભ કરી દીધો. ઇતિહાસમાં કદાચ ક્યારેય ન સર્જાયું હોય એવું આ મહાન અને વિરાટ દેશ્ય હતું! પરંપરાગત રીતે ટીવી ચેનલો પર કે ઇન્ટરનેટ દ્વારા લાઇવ જોઈ રહેલા ભાવનાઓથી ગદ્ગદિત ભક્તોનાં માનસમાં તથા જિલ્લા પર એક જ નામનું રટણ ચાલી રહ્યું હતું, રામ, રામ અને રામ!