વિઝા વિમર્શ,

ભારતીયોની મનપસંદ યુનિવર્સિટીઓ

-  ડો.સુધીર શાહ

અમેરિકામાં જુદી-જુદી અસંખ્ય યુનિવર્સિટીઓ આવેલી છે. વિશ્વના બધા જ દેશો અને ત્યાંની યુનિવર્સિટીઓ કરતાં અમેરિકાની યુનિવર્સિટીઓ ખૂબ જ સારી છે એવું આપણને સૌને લાગે છે. આ વાત મોટા ભાગે સાચી છે, પણ અમેરિકામાં એવી પણ યુનિવર્સિટીઓ છે, જેના શિક્ષણનું સ્તર ખૂબ જ નીચું છે. ભણવાના બહાને જેઓ અમેરિકામાં ઘૂસવા ચાહે છે, અમેરિકામાં પ્રવેશીને ગેરકાયદેસર કામ કરવા માગે છે એવા પરદેશીઓની સગવડ ખાતર અમેરિકામાં ઘણી યુનિવર્સિટીઓ ખૂલેલી છે, જે ફકત નામની યુનિવર્સિટીઓ છે. વિદ્યાર્થી એમાં હાજરી આપે કે ન આપે એની તેમને પડી નથી હોતી. તેઓ તો ફક્ત વિદ્યાર્થી એમને ફી આપે એટલી જ મતલબ ધરાવતા હોય છે.

અનેક વિદ્યાર્થીઓ અમેરિકાની યુનિવર્સિટીમાં પ્રવેશ મેળવવા માટે ‘આઇલ્ટસ’ કે‘ટોફેલ’ની માર્ક્સશીટ પૈસા આપીને ખરીદતા હોય છે. પોતાને બદલે બીજા અંગ્રેજી ભાષા ઉપર કાબૂ ધરાવતા લોકોને પરીક્ષામાં બેસાડે છે. અનેકો માર્ક્સશીટ અને ડિગ્રી ડિપ્લોમાનાં ખોટાં સર્ટિફિકેટો તૈયાર કરાવે છે. તમારે જો ખરેખર અમેરિકામાં શિક્ષણ પ્રાપ્ત કરવા જવું હોય તો ત્યાંની સારી અને ખરેખર શિક્ષણ આપતી યુનિવર્સિટીમાં જ પ્રવેશ મેળવજો. ‘આઇલ્ટસ’ યા ‘ટોફેલ’ની પરીક્ષા જાતે આપજો. કોઈ દસ્તાવેજો, સર્ટિફિકેટો, સ્ટેટમેન્ટ્સ બનાવટી રજૂ નહીં કરતાં. ટ્યુશન ફી અને અન્ય ખર્ચાના પૈસા હવાલા મારફતે નહીં, પણ બેન્ક ટ્રાન્સફરથી જ મેળવજો અને ભૂલેચૂકે પણ તમારા ફાજલ સમયમાં કે શનિ-રવિની રજામાં ત્યાંની કોઈ પણ મોટેલ, હોટેલ, ફાસ્ટફૂડ, ગેસ સ્ટેશન, કન્વિનિયન્સ સ્ટોર કે કશામાં પણ કામ કરતા નહીં.