ચૈત્રી નોરતાં એટલે આપણી ઊર્જા સાથેનાં મૈત્રી નોરતાં..

આપણામાં ઊર્જા તો હોય, પણ એ ઊર્જા નકારાત્મકરૂપે હોય તો? એ ઊર્જા અસંતોષ, ઈર્ષ્યા, લાલચ, વ્યગ્રતા જેવા રૂપમાં હોય તો? તો એ ઊર્જા આપણને ઊલટી ચાલ લઈ જાય છે. આપણી ઊર્જાને યોગ્ય માર્ગે વાળવાનું તપ આપણે કરવાનું હોય છે.

- મિલી મેર

અત્યારે ચૈત્રી નોરતાં ચાલુ છે, જૈન પરમ્પરાના વર્ષી તપ શરૂ થયા છે અને મુસ્લિમ બિરાદરોના રોજા ચાલુ છે. આ ઉપવાસ એ પણ પરમતત્ત્વની ઉપાસનાનો એક માર્ગ છે. શરીરને કષ્ટ આપીને, જાતને ખોરાક-પાણી જેવી પ્રાથમિક જરૂરિયાતોથી પણ અલગ કરીને પરમશક્તિની નિકટ જવાનો આ રસ્તો છે. જાતને અભાવમાં મુકીને સતત એક સ્મરણ, એક સજાગતા કેળવવાની આ સાધના છે.

વ્યક્તિ જ્યારે પૂરો સમર્પિત રહીને ઉપવાસ કરે છે ત્યારે આખા દિવસ દરમિયાન કશું પણ કાર્ય કરતાં, કોઈની સાથે વાત કરતાં, કે ક્યાંય પણ વ્યસ્ત હોય, પણ એની અંદર એક સ્મૃતિ હોય છે કે પોતે કોણ છે, પોતાને આજે ઉપવાસ, એ સ્મૃતિ સાથે એ જાગૃતિ પણ આવે છે કે પોતે આજે કેમ-કોના માટે ઉપવાસ રહ્યો છે. કશું જ પણ કામ કરતાં આ જાગૃતિ એને પોતાની જાત સાથે જોડે છે, આ સ્મૃતિ એને ઈશ્વર સાથે જોડી રાખે છે, આ જાગૃતિથી એ વ્યક્તિ મટી ઉપાસક થાય છે.