કવર સ્ટોરી

ગુજરાતમાં ભાજપની ‘ક્લીન સ્વીપ’ પર કોંગ્રેસે આખરે ‘બ્રેક' મારી

- પ્રજ્ઞેશ શુક્લ

લોકશાહીના મહાપર્વ સમાન લોકસભા ચૂંટણીનાં બહુપ્રતીક્ષિત પરિણામો જાહેર થઈ ગયાં છે. ૭ મેના રોજ યોજાયેલા લોકસભા ચૂંટણીના મતદાન બાદ ગુજરાતની જનતા આતુરતાપૂર્વક પરિણામોની રાહ જોઈ રહી હતી. ૪ જૂન, મંગળવારે જાહેર થયેલાં પરિણામોમાં ભારે રસાકસી અને કશ્મકશ બાદ આખરે કોંગ્રેસ ભાજપના સૌથી મોટા અને મજબૂત ગઢ ગણાતા ગુજરાતમાં ગાબડું પાડવામાં સફળ રહી છે. ૧૦ વર્ષના લાંબા ‘વનવાસ’ બાદ અંતે કોંગ્રેસે ગુજરાતમાં પોતાનું ખાતું ખોલ્યું છે. આ વખતની ચૂંટણીમાં સૌથી હાઈપ્રોફાઇલ ગણાતી અને બે મહિલા ઉમેદવારોની જોરદાર ટક્કરની સાક્ષી બનેલી બનાસકાંઠા બેઠક ભાજપને ભારે પડી છે. બનાસકાંઠા લોકસભા બેઠક પરથી ‘બનાસની બહેન' તરીકે લોકપ્રિય એવાં કોંગ્રેસનાં ઉમેદવાર ગેનીબહેન ઠાકોરની ભવ્ય જીત થઈ છે અને તેમણે ભાજપનાં ઉમેદવાર ડૉ. રેખાબહેન ચૌધરીને ૩૧ હજાર કરતાં પણ વધુ મતથી હાર આપી છે. કોંગ્રેસનાં તેજાબી નેતા ગેનીબહેન ઠાકોરે ગુજરાતમાં ભાજપનું સતત ત્રીજી વખત તમામ ૨૬ બેઠકો જીતીને હેટ્રિક કરવાનું સપનું રોળી નાખ્યું છે અને કોંગ્રેસનું જોરદાર કમબૅક કરાવ્યું છે.