વિઝા વિમર્શ

વારંવાર પૂછાતા પ્રશ્નો

- ડો.સુધીર શાહ

દિવસે દિવસે ભારતમાંથી અમેરિકા ભણવા જતા વિદ્યાર્થીઓની સંખ્યામાં વધારો થતો રહ્યો છે. આથી એફ-૧ સંજ્ઞા ધરાવતા સ્ટુડન્ટ વિઝા મેળવવા માટે હવે ખૂબ-ખૂબ લાંબી લાઇનો લાગે છે અને માન્યમાં ન આવે એટલી વાટ જોવી પડે છે. વિદ્યાર્થીઓ માટે તો અમેરિકન કોન્સ્યુલેટ ખાસ સવલત કરે છે. યુનિવર્સિટી શરૂ થવાની હોય એના મહિના બે મહિના પહેલાં એમાં ભણવા જવા ઇચ્છતા ભારતીય વિદ્યાર્થીઓ માટે ઇન્ટરવ્યૂ આપવાની ખાસ સગવડ કરી આપે છે. અમેરિકાની મોટા ભાગની યુનિવર્સિટીઓ જુલાઈ, ઑગસ્ટ યા સપ્ટેમ્બરમાં શરૂ થતી હોય છે. યુનિવર્સિટીનું સત્ર શરૂ થાય એ પહેલાં તેઓ ઓરિએન્ટેશન પિરિયડ રાખે છે. જેમાં પરદેશી વિદ્યાર્થીઓને એમની યુનિવર્સિટીઓ વિષે સઘળી જાણકારી આપવામાં આવે છે અને એમને યુનિવર્સિટી તેમ જ એમના પ્રોફેસરો અને સ્ટાફ મેમ્બરોનો પરિચય કરાવવામાં આવે છે.

આ સર્વે કારણોસર મે, જૂન, જુલાઈ આ મહિનાઓમાં એફ-૧ સંજ્ઞા ધરાવતા સ્ટુડન્ટ વિઝાના અરજદારો ખૂબ જ મોટી સંખ્યામાં ભારતમાં આવેલ કોન્સ્યુલેટોમાં વિઝા માટે અરજી કરતા હોય છે. સ્ટુડન્ટ વિઝાના અરજદારોને સામાન્ય રીતે નીચેના અથવા એના જેવા સવાલો પૂછવામાં આવે છે.