ફેમિલી ઝોન નવી ક્ષિતિજ

રાઇટ એન્ગલ, રાઇટ ટાઇમ સારા ફોટોગ્રાફરતી છે યોગ્યતા

- હેતલ ભટ્ટ

ફોટોગ્રાફી એ ટેક્નોલોજી અને આર્ટનું મિશ્રણ છે. તેથી જ કહેવાયું છે કે એક તસવીર કહ્યા વિના પણ ઘણું બધું કહી જતી હોય છે. એક ચિત્ર સો શબ્દોને વ્યાખ્યાયિત કરવાની ક્ષમતા ધરાવે છે. વર્તમાન સમયમાં ફોટોગ્રાફી આપણા જીવનનું અભિન્ન અંગ બની ચૂકી છે. મોબાઇલ કેમેરામાં આવેલી ક્રાંતિએ ઘરે ઘરે ફોટોગ્રાફરને જીવંત કરી દીધો છે. આપણે આપણી યાદોને ફોટાના રૂપમાં કેદ કરી લઈએ છીએ અને એ યાદ હંમેશાં આપણી સાથે જીવનપર્યંત જોડાયેલી રહે છે. જોકે ફોટોગ્રાફીનો શોખ હોવો અને પ્રોફેશનલ રીતે ફોટોગ્રાફી કરવી એ બે અલગ વસ્તુ છે. ફોટોગ્રાફીના શોખમાં ચીવટતાની જરૂર નથી હોતી, કારણ કે તે શોખ ખાતર કરવામાં આવતી હોય છે, જ્યારે પ્રોફેશનલ ફોટોગ્રાફીમાં ચીવટતાની સાથે યોગ્ય એન્ગલ, ઓબ્જેક્ટ ફોકસ, ડિસ્ટન્સ મેટર વગેરે ઘણી બાબતો ધ્યાને રાખવી પડતી હોય છે.

દરેક વ્યક્તિ ફોટોગ્રાફી કરવાનો શોખ ધરાવતી હોય છે, પણ જો કોઈ વ્યક્તિને આ ક્ષેત્રમાં પોતાની કારકિર્દી બનાવવાની ઇચ્છા હોય તો તેણે ફોટોગ્રાફીને લગતો અભ્યાસ કરવો જરૂરી બની રહે છે. જેથી ફોટોગ્રાફી સાથે જોડાયેલાં વિવિધ પાસાંઓને સારી રીતે સમજી શકાય. મહત્ત્વના પ્રસંગોએ પ્રોફેશનલ ફોટોગ્રાફરની જ મદદ લેવામાં આવતી હોય છે, કારણ કે આ પ્રકારની તસવીરોને કંડારવા માટે જરૂરી હાઈ રેઝોલ્યુશન ધરાવતા લેન્સવાળા કેમેરા તેમની પાસે ઉપલબ્ધ હોય છે. જો તમારા ફોટોગ્રાફીના શોખને એક ડગલું આગળ વધીને પ્રોફેશનમાં પરાવર્તિત કરવા માગતા હો તો વ્યક્તિ પાસે કેટલીક જરૂરી સ્કિલની આવશ્યકતા રહેતી હોય છે.