સાંપ્રત

ટ્રમ્પ જીતશે તો મૂળ ભારતની ઉષા ખીલશે, નહીં તો કમલા તો છે જ!

- વિનોદ પંડ્યા

અમેરિકાના પ્રમુખ તરીકે રિપબ્લિકન ડોનાલ્ડ ટ્રમ્પ ચૂંટાઈ આવે કે પછી ડોમોક્રેટ કમલા હેરિસ ચૂંટાઈ આવે, કોઈ પણ પરિણામમાં ભારતને જરૂર યાદ કરવામાં આવશે. કમલા હેરિસનું આખું નામ કમલાદેવી હેરિસ છે અને એમનાં માતા શ્યામલા ગોપાલન મૂળ તામિલનાડુનાં છે, જે ૧૯૫૮માં વધુ અભ્યાસ માટે અમેરિકા જતાં રહ્યાં હતાં. એ કેલિફોર્નિયા યુનિવર્સિટીમાં સ્તન કૅન્સર વિષે વધુ સંશોધનો માટેનો અભ્યાસ કરી રહ્યાં હતાં. એ દિવસોમાં ૧૯૬૧થી જમૈકાનો ડોનાલ્ડ જે. હેરિસ નામનો તેજસ્વી વિદ્યાર્થી સેનફોર્ડ યુનિવર્સિટીમાં અર્થશાસ્ત્રના વધુ અભ્યાસ માટે આવ્યો હતો. સ્ટેનફોર્ડમાં પ્રવેશ મેળવનાર એ પ્રથમ અશ્વેત યુવાન હતો. શ્યામલા ગોપાલન અને ડોનાલ્ડ હેરિસ પરિચયમાં આવ્યાં અને પરણી ગયાં. કમલા નાની હતી ત્યારે તેઓ બર્કલે, કેલિફોર્નિયાના એક નાનકડા મકાનમાં રહેતાં હતાં. ૧૯૭૦માં ડોનાલ્ડ હેરિસ સાથે છૂટાછેડા લીધા અને ત્યાર બાદ શ્યામલાએ જ કમલા અને એની નાની બહેન માયાદેવીનો ઉછેર કર્યો હતો. કમલા અને માયા ચેન્નાઈમાં એમના નાના અને મામાના ઘરે વૅકેશનમાં અવારનવાર આવતી હતી. કમલા હેરિસ તો અમેરિકાનાં ઉપપ્રમુખ છે. પ્રથમ અશ્વેત અને અમેરિકામાં પ્રથમ મહિલા ઉપપ્રમુખ બન્યાં, ત્યાર બાદ એમના વિશે અવારનવાર લખાતું રહે છે.

કમલા હેરિસ જીતે તેવી શક્યતા વધુ છે, પણ ધારો કે ટ્રમ્પ ચૂંટણી જીતી જાય તો પણ ભારતનું નામ લેવાશે. ડોનાલ્ડ ટ્રમ્પે ઉપરાષ્ટ્રપતિ પદ માટે એમના રનિંગ મેટ તરીકે જે.ડી. વાન્સ નામના એમના એક સાથીદારની પસંદગી કરી છે. ડોનાલ્ડ ટ્રમ્પ ચૂંટાઈ આવે તો જે.ડી. વાન્સ આપોઆપ ઉપરાષ્ટ્રપતિ બને. આ વાન્સનાં પત્ની મૂળ આંધ્રપ્રદેશના વિશાખાપટ્ટનમની બ્રાહ્મણ કુટુંબની ઉષા ચિલુકુરી વાન્સ છે. ઉષા અને કમલા બંનેનો જન્મ અમેરિકામાં થયો છે, પણ ઉષા પોતાને ભારતીય હિન્દુ તરીકે ઓળખાવે છે અને હિન્દુ હોવાનો એમને ગર્વ છે. જે.ડી. વાન્સ સાથે એમણે લગ્ન કર્યાં ત્યારે એમણે ભારતીય ઢબે વસ્ત્રો અને શણગાર સજ્યાં હતાં.