આ વિનોદ ભટ્ટનું નહીં, ગુજરાતના સ્મિતનું સમ્માન

‘ચિત્રલેખા’ પરિવાર દ્વારા અમદાવાદમાં આયોજિત હાસ્યના પર્યાય સમા વિનોદ ભટ્ટને ‘વજુ કોટક સુવર્ણચંદ્રક’ એનાયતનો સમારંભ યાદગાર બની રહ્યો.

- કેતન મિસ્ત્રી (અમદાવાદ)

ગુજરાતના મુખ્ય મંત્રી ભૂપેન્દ્રભાઈ પટેલના હસ્તે સ્વર્ગીય વિનોદ ભટ્ટના પુત્ર સ્નેહલ ભટ્ટને ‘વજુ કોટક સુવર્ણચંદ્રક' અર્પણ થયો એ ક્ષણ હાસ્યલેખક રતિલાલ બોરીસાગર, લોકકલાકાર સાંઈરામ દવે, સંસદસભ્ય પરિમલ નથવાણી, ‘ચિત્રલેખા’ના ચૅરમૅન મૌલિક કોટક, ગુજરાતના ગૃહ રાજ્ય મંત્રી હર્ષ સંઘવી તથા ઉપસ્થિત શ્રોતાજનો માટે કાયમી સંભારણું બની ગઈ.

એક સમય હતો જ્યારે અત્તરિયો ખુશબોદાર અત્તર વેચવા આવતો. અત્તરની ગુણવત્તા બતાવવા એ પાતળી સળીમાં અત્તર લઈ હાથ પર લગાડતો. તે વખતે લોકો જુદાં જુદાં અત્તર લગાડવાની ફરમાઈશ કરતા અને અત્તરિયો એ પૂરી કરતો. આપણે અત્તર લઈએ કે ન લઈએ એ ગૌણ છે. મહત્ત્વનું આપણું શરીર મઘમઘતું રહેતું. વિનોદ ભટ્ટ કંઈ આવું જ કામ કરી ગયા. એમણે આપણા માટે સતત હાસ્ય સર્જ્ય, ખૂબ લખ્યું અને આપણાં જીવન મહેકતાં રાખ્યાં..

હૂંફાળો આવકાર: ‘ચિત્રલેખા' પરિવાર વતી મૌલિક કોટક અને મનન કોટકે મુખ્ય મંત્રી ભૂપેન્દ્રભાઈ પટેલનું સ્વાાત કર્યું ત્યારે ઑડિયન્સે આદર-સત્કારને વધાવી લીધા..

આ શબ્દો હતા દેશ-વિદેશના ગુજરાતીઓ માટે હાસ્યનું બ્રાન્ડનેમ બની ગયેલા સાંઈરામ દવેના. સ્થળ હતું અમદાવાદ મૅનેજમેન્ટ ઍસોસિયેશનનો એચટી પારેખ કન્વેન્શન હૉલ. અવસર હતોઃ હાસ્યલેખક વિનોદ ભટ્ટને વજુ કોટક સુવર્ણચંદ્રક (મરણોત્તર) એનાયત સમારંભ.

પોતાના વક્તવ્યમાં સાંઈરામ દવેએ સ્વર્ગીય વિનોદ ભટ્ટને સ્વર્ગમાં લખેલા પત્રનું વાંચન કર્યું હતું. કલમથી નહીં, પણ દિલથી લખાયેલા આ પત્રએ કાર્યક્રમને એક નવી ઊંચાઈ બક્ષી અને વજુ કોટક સુવર્ણચંદ્રક એનાયત સમારંભ એક સ્તરીય કાર્યક્રમ બની ગયો. સાંઈરામભાઈએ મંચ પરથી હાસ્યરસ વહાવી શ્રોતાને પરમ તૃપ્ત કરી દીધા. એમણે બહુ સરસ વાત કરી કે આ વિનોદ ભટ્ટનું નહીં, પણ ગુજરાતના સ્મિતનું સમ્માન છે અને આ ચંદ્રક વિનોદને નહીં, વિનોદની નજરને એનાયત થાય છે.

‘ચિત્રલેખા’ એટલે ગુજરાતીઓની પોતીકી ઓળખ.

                                                   - ભૂપેન્દ્ર પટેલ