હોળીનું નાળિયેર કોના માથે ફોડવું?

વડા ન્યાયમૂર્તિ એન.વી. રમણઃ કેસની સંખ્યા ઓછી કરવી હોય તો ન્યાયાધીશોની ખાલી જગ્યા ભરો!

અદાલતોમાં વધતા જતા કેસના પ્રમાણ માટે વધુ જવાબદાર કોણ? કેન્દ્ર સરકાર કે ખુદ ન્યાયતંત્ર?

આ મુદ્દે બન્ને પક્ષે સામસામે જવાબદારી ઠાલવવાની ચડસાચડસી ઘણા સમયથી ચાલે છે અને કાયદાપ્રધાન કિરેન રિજિજુ તથા સર્વોચ્ચ અદાલતના વડા ન્યાયમૂર્તિ એન.વી. રમણ વચ્ચે હમણાં ફરી આ વિવાદ છેડાયો.

દેશની વસતિ અને રોજેરોજ પોલીસચોપડે નોંધાતા અને ત્યાર બાદ અદાલતમાં દાખલ કરવામાં આવતા કેસની સંખ્યાનું પ્રમાણ એટલું મોટું છે કે વર્ષો સુધી એક પણ નવો કેસ ન નોંધાય તો પણ અત્યારે જુદા જુદા તબક્કે જે કેસ પેન્ડિંગ છે એનો નિકાલ આવતાં દાયકાઓ નીકળી જાય એમ છે. આ હકીકત સામે કાયદાપ્રધાને નુક્તેચીની કરી એટલે વડા ન્યાયમૂર્તિ એન.વી. રમણે એ માટે સરકારને જ આરોપીના કઠેડામાં મૂકી દીધી.