સાવજપ્રેમી સંસદસભ્ય

પરિમલ નથવાણી: ડોક્યુમેન્ટરી બનાવવા પાછળનો ઉદ્દેશ છે સિંહોની દુનિયા લોકોને દેખાડવાનો.

હું પાંત્રીસેક વર્ષથી ગીરમાં સિંહદર્શન કરવા જાઉં છું. સિંહ મૂળ એક ભોળું પ્રાણી છે. એ ક્યારેક હિંસક બને, પરંતુ શિયાળ કે ચિત્તા જેવું લુચ્ચું પ્રાણી નથી. સિંહ પોતાના મિજાજ મુજબ-રુઆબભેર જીવે છે. એનો ઠસ્સો અને એની ગરિમા આ પ્રાણીને જંગલનો રાજા બનાવે છે.. આ શબ્દો છે પરિમલ નથવાણીના.

રિલાયન્સ ઈન્ડસ્ટ્રીઝ લિમિટેડના ડિરેક્ટર (કૉર્પોરેટ અફેર્સ) તથા રાજ્યસભાના સભ્ય પરિમલભાઈ વન્યજીવસૃષ્ટિના ચાહક છે અને અવારનવાર જંગલપ્રવાસ કરતા રહે છે. એના અનુભવો પણ પરિમલભાઈ સોશિયલ મિડિયા પર વર્ણવતા રહે છે. થોડા જ સમય પહેલાં એમણે અમદાવાદ ઍરપોર્ટ પર ગીર ગૅલરી બનાવી તથા અંગ્રેજી સચિત્ર કૉફી ટેબલ બુક ગીર લાયનઃ પ્રાઈડ ઑફ ગુજરાત પ્રકાશિત કરી તો હવે એમણે ડોક્યુમેન્ટરી પણ બનાવી છે.